Deklaratë e ministres së Mbrojtjes Mimi Kodheli

e mërkurë, 07 Maj 2014 19:08

Duke e përshëndetur dhe falënderuar presidentin Nishani për vëmendjen që tregon ndaj zhvillimeve në fushën e Mbrojtjes, por duke konstatuar edhe një lexim të gabuar nga ana e presidentit të disa projekt-ligjeve të inicuara nga Ministria e Mbrojtjes me mbështetjen e plotë teknike të partnerëve tanë ndërkombëtare, ministrja e Mbrojtjes Mimi Kodheli, ndjen detyrimin të sqarojë publikisht se komentet e bëra nga presidenti Nishani në njoftimin e tij për shtyp lidhur me projekt-ligjet në fjalë janë absolutisht pa lidhje.

Së pari, Ministria e Mbrojtjes është konsultuar me çdo aktor dhe faktor relevant në lidhje me çështjet e trajtuara në projekt-ligjet e saj, përfshirë edhe aktorin dhe faktorin president i Republikës me të cilin, ministrja Kodheli edhe drejtpërdrejt, edhe në nivelin më të lartë politik në tryezën e Këshillit të Sigurisë Kombëtare, po edhe në nivel ekspertësh në tryeza diskutimesh, ka këmbyer opinionet e nevojshme për sa i takon.

Së dyti, Ministria e Mbrojtjes e siguron me këtë rast presidentin Nishani ashtu si gjithë opinionin publik se të tre projekt-ligjet e cituara prej tij si produkte me mangësi ligjore që cenojnë balancën e pushteteve kushtetuese, janë në fakt një shprehje koherente ligjore e Kushtetutës së Republikës së Shqipërisë dhe e standardeve organizative të një vendi të NATO, ku në asnjë prej republikave parlamentare të Aleancës së Atlantikut të Veriut, presidenti nuk ka përveç përgjegjësive që i jep Kushtetuta edhe përgjegjësi të mbetura si atavizma të regjimit komunist.

Së treti, ministrja e Mbrojtjes garanton se ka qenë dhe mbetet përherë e gatshme të dëgjojë drejtpërdrejt nga presidenti i Republikës çfarëdo leximi të gabuar, që nuk mund të jetë asnjëherë po kaq për të ardhur keq, sa kur “dëgjohet” pasi është dëgjuar më parë nga ambasadorët e vendeve anëtare të NATO.