Newsroom Deklarata për shtyp Deklaratë për shtyp e ministrit të Mbrojtjes Niko Peleshi mbi stërvitjen amerikane “Defender 21”, që do të zhvillohet nga data 1 maj deri më 14 qershor 2021
Më lejoni të shpreh kënaqësinë e veçantë të kem sot në krah gjeneral Jarrard, në këtë vizitë të jashtëzakonshme, e cila bëhet në një periudhë intensive pune e organizimi të stërvitjes më të madhe ushtarake, që Shqipëria dhe rajoni kanë mirëpritur ndonjëherë, stërvitjes “Defender Europe 21”. Është padyshim një nga angazhimet më serioze të ndërmarra nga Forcat tona të Armatosura.
I nderuar gjeneral,
Ju siguroj, se Shqipëria do të jetë një mikpritës i denjë për forcat e Shteteve të Bashkuara, aleatëve dhe partnerëve, të cilët do të zbarkojnë këtu në muajin maj të këtij viti.
Angazhimi për zhvillimin me sukses të kësaj stërvitjeje në territorin tonë është jo vetëm një angazhim ushtarak dhe politik, por edhe një moment i rëndësishëm për qytetarët e këtij vendi. Sot ju shpreh edhe në emër të tyre mirënjohjen dhe dashamirësinë ndaj Shteteve të Bashkuara dhe aleatëve të tjerë të NATO-s.
Ministria e Mbrojtjes, ka gjetur mbështetjen e plotë dhe të pakushtëzuar të të gjitha strukturave të shtetit shqiptar, me qëllim realizimin me sukses të stërvitjes “Defender Europe 21”. Personeli ushtarak shqiptar prej muajsh tashmë është angazhuar në identifikimin, ndjekjen dhe zbatimin në terren të çdo detyrimi që na lind nga kjo stërvitje. Sfida për organizimin e kësaj stërvitje bëhet akoma më e madhe në këtë kohë të vështirë pandemie globale. Punës e angazhimit për të realizuar me sukses çdo detyrë i shtohet edhe kujdesi për të mbrojtur shëndetin e trupave dhe të popullatës. Kemi rënë dakord që protokollet shëndetësore të mbështeten në eksperiencat më të mira të dy vendeve tona, duke respektuar të gjitha rekomandimet e Organizatës Botërore të Shëndetësisë, për parandalimin dhe përhapjen e virusit “COVID 19”.
Gjeneral,
Pa asnjë dyshim, Shqipëria si vend aleat në NATO, ndihet shumë e vlerësuar dhe shumë e nderuar për faktin se i është besuar detyra e vendit “Host Nation” për një nga stërvitjet më të mëdha ushtarake të Shteteve të Bashkuara në gadishullin e Ballkanit dhe në Evropën Veriore dhe Qendrore.
Shqipëria ka treguar të jetë një vend me politika luajale ndaj Shteteve të Bashkuara, partnerëve NATO si dhe çdo vendi fqinj në Ballkan, duke vendosur mbi gjithçka parimin e bashkëjetesës në paqe dhe prosperitet mes popujve tanë.
I nderuar gjeneral,
Jam i bindur se në takimet e mëtejshme me krerët e institucioneve të shtetit shqiptar do të gjeni konfirmimin më të plotë të çfarë unë ju shpreha: respektin për besimin dhe seriozitetin për ta përmbyllur me sukses këtë angazhim të jashtëzakonshëm për ne. Më lejoni t’ju falënderoj për ndihmën e pakursyer tuajën dhe të ekspertëve tuaj. Mirënjohje të thellë vlerësimit që iu bë Shqipërisë nga Shtetet e Bashkuara në përzgjedhjen si vend pritës për një stërvitje të përmasave të tilla.
Nuk ka asnjë dyshim se “Defender Europe 21” dhe të gjitha aktivitetet e ngjeshura stërvitore të NATO-s në Evropë, në periudhën maj-qershor '21, do të sjellin pranë qytetarëve tanë imazhin e një Aleance më të fortë dhe më të bashkuar së kurrë më parë!
Ju faleminderit!
