Fjala e plotë e ministres së Mbrojtjes Kodheli në ceremoninë e dorëzimit të 27 automjeteve ndihmë nga FA të Turqisë

e mërkurë, 03 qershor 2015 13:22

I nderuar ambasadori Bayraktar,
të nderuar gjeneralë,
ushtarakë, të pranishëm,

Takimi me miqtë tanë, ambasadorin Bayraktar dhe kolonelin Dogar po shndërrohet në një temë të përditshme të axhendës tonë të përbashkët. Ishim së bashku dy ditë më parë teksa përcollëm kontingjentin tonë paqeruajtës drejt Afganistanit. Sot jemi prapë bashkë me rastin e ardhjes së një sasie të konsiderueshme mjetesh automobilistike, që do t’i shërbejnë Forcave tona të Armatosura, ardhur falë kontributit që Shtabi i Përgjithshëm i Republikës së Turqisë na ofron bujarisht çdo vit.

Këto 27 mjete janë pjesë e paketës së mjeteve të transportit, një projekt që ne e nisëm së bashku në fundin e vitit 2014. Ne do të vazhdojmë këtë projekt modernizimi edhe në vitet në vazhdim. Përmirësimi i transportit të Forcave tona të Armatosura, vazhdon të jetë në listën prioritare të përpjekjes së përbashkët që prej 20 muajsh qeverisje.

Sfidat e reja të sigurisë dhe ekonomisë botërore, kërkojnë me ngulm parjen e bashkëpunimit mes vendeve aleate si mundësinë primare jetike të suksesit, në këto kohë mungesash dhe radikalizmi. Gjendemi së bashku me aleatët tanë në zonat më të nxehta të globit, marrim përsipër angazhime në përmbushje të kërkesave të Aleancës, por dhe mendojmë në çdo moment për përmirësimin e realitetit me të cilin përballemi.

Viti 2015 ka sjellë disa ndryshime të rëndësishme për Forcat tona të Armatosura, përsa i përket modernizimit të tyre. Armatimi i ri i standardit NATO, si dhe paketa e mjeteve të transportit të përftuara nga granti turk, kanë ndryshuar shumë në realitetin e përditshmërisë së punës tuaj, të nderuar ushtarakë. Po bëjmë maksimumin për të shpenzuar me efiçencë çdo qindarkë e mundësi të ofruar për të modernizuar sipas standardeve të Aleancës, në mënyrë graduale të gjitha strukturat tona ushtarake.

Ashtu si dhe pesë muaj më parë, kur mbërriti paketa e parë e mjeteve të transportit nga Turqia, dua të ritheksoj edhe një herë se procedura e ndjekur ishte në përputhje jo vetëm me nevojat e Forcave tona të Armatosura, por dhe në transparencë maksimale me aleatët tanë turq. Strukturat kanë bërë të mundur ardhjen e këtyre mjeteve, sipas kërkesave, procedurave dhe transparencës dhe shpejtësisë për t’i vënë këto projekte në zbatim.

Dua të falënderoj Qeverinë dhe Forcat e Armatosura të Republikës së Turqisë, për mbështetjen e pakursyer ofruar deri më tani, sidomos në kuadër të trajnimeve, edukimit apo edhe pajisjeve, ndërkohë që dua t’i siguroj ata që ne do t’i përligjim më së miri këto investime dhe do të vijojmë më tej bashkëpunimin në të ardhmen. Një falënderim i posaçëm shkon dhe për Zyrën e Atasheut Ushtarak Turk në Tiranë, për kujdesin e veçantë të treguar në plotësimin e të gjitha kërkesave tona për modernizimin e Forcave të Armatosura të Republikës së Shqipërisë.

Ju faleminderit!