Fjalimi i ministrit të Mbrojtjes në Takimin e Ministrave të Mbrojtjes të CEDC dhe vendeve partnere të Ballkanit Perëndimor

e mërkurë, 08 shkurt 2017 12:10

Të nderuar kolegë,

më lejoni të filloj duke përgëzuar organizatorët për këtë takim të rëndësishëm për të gjithë vendet tona të përfaqësuara sot në Vjenë. Forume të tilla na ndihmojnë jo vetëm për të shkëmbyer ide, por edhe për të filluar të gjejmë zgjidhje për sfidat e përbashkëta që vendet tona përballen çdo ditë.

Emigracioni i jashtëligjshëm është duke u bërë në mënyrë progresive një nga çështjet kryesore të sistemit ndërkombëtar. Dhuna e vazhdueshme politike dhe destabiliteti në periferinë jugore të NATO dhe BE, nënkupton se emigracioni i jashtëligjshëm do të vazhdojë të jetë një sfidë madhore e sigurisë në të ardhmen. Miliona emigrantë, kryesisht nga Siria, kanë kaluar detin Mesdhe në kërkim të një jete më të mirë në zonën evropiane.

Ndërkohë, ne jemi dëshmitarë të një rritjeje të shqetësimeve legjitime në rajonin tonë, të krijuara nga ndikimi që kriza e refugjatëve mund të ketë në sigurinë kombëtare, rajonale dhe më gjerë. Shqipëria mbështet përpjekjet e komunitetit humanitar ndërkombëtar në Siri dhe Irak dhe në të gjithë rajonin, në ofrimin e ndihmës për të plotësuar nevojat kritike të atyre që janë zhvendosur apo dëmtuar nga konflikti dhe dhuna.

Qeveria shqiptare ka ndërmarrë shumë masa, edhe pse ne nuk jemi ndikuar nga kriza e refugjatëve si vendet e tjera në rajon. Ne kemi hartuar një plan emergjence, i cili përfshin elementë të mundshëm që mund të vihen në punë në rast të devijimeve të rrugës së refugjatëve drejt Shqipërisë. Por, ne kemi vendosur të mos mbetemi të izoluar në territorin tonë. Qysh nga nëntori 2016, në perspektivën e një kontributi ushtarak, Shqipëria merr pjesë me një anije patrullimi në aktivitetin detar të NATO në Egje, i cili tashmë është duke bashkëpunuar me operacionin e BE "Sofia", Agjencinë e Kufijve të Jashtëm të BE (FRONTEX), Greqinë dhe Turqinë në përpjekjet për të ndaluar krizën e emigrantëve dhe refugjatëve.

Për shumë vite Shqipëria ka theksuar shqetësimin lidhur me fenomenin e “luftëtarëve të huaj” dhe aspektin e sigurisë lidhur me kthimin e tyre në vendlindjet e tyre. Një pjesë tjetër e angazhimeve dhe përpjekjeve shqiptare për të kuptuar më mirë këtë fenomen është nisma e krijimit të një Qendre Ekselence të NATO në Tiranë, për t'u marrë me kërcënimin e “luftëtarëve të huaj”. Kjo nismë është një vlerë e shtuar dhe një kontribut i konsiderueshëm që Shqipëria po i jep NATO, por edhe vendeve të rajonit tonë. Një punë e gjatë është kryer, pavarësisht nga fakti se çështja e luftëtarëve të huaj është shumë komplekse.

Bashkëpunimi me njëri - tjetrin është shumë i rëndësishëm për të shmangur pasojat e lëvizjeve të njëanshme, jo vetëm për shkak të ndikimit shumë negativ dhe rreziqeve që kjo do të sjellë për secilin nga vendet tona, por edhe sepse kjo nuk i zgjidh problemet e krizës së refugjatëve. Kjo nuk është thjesht një çështje për të hapur apo mbyllur kufijtë. Ky është një angazhim për t’u bërë pjesë e një zgjidhjeje të gjerë evropiane, bazuar në solidaritet dhe kapacitet, në gatishmëri për të mbrojtur vlerat e parimet dhe, respektit për ligjin ndërkombëtar. Shqipëria vlerëson shumë dhe do të bashkohet me nismat dhe veprimet e mundshme për të ndihmuar në forcimin e zellit të vendeve pjesëmarrëse për të përballuar krizën e refugjatëve dhe të emigrimit.

Si përfundim, më lejoni të falënderoj dhe përgëzoj edhe një herë Austrinë si vend pritës, si dhe presidencat e Hungarisë dhe Republikës Çeke, për punën e bërë deri më tani dhe organizimin e shkëlqyer të këtij takimi.

Faleminderit!