Fjala e plotë e ministrit të Mbrojtjes, z. Piro Vengu në Ministerialin e Mbrojtjes të nismës ADRION, mbajtur në Venecia

e hënë, 07 tetor 2024 18:58

I nderuar Ministër Crosetto, i dashur Guido,
Të nderuar kolegë nga vendet e Iniciativës ADRION,
Admiralë, gjeneralë, oficerë të çdo grade dhe kapaciteti tuaj,

Së pari, dua të falënderoj përzemërsisht ministrin Crosetto, jo vetëm për mikpritjen e shkëlqyer që ofron gjithmonë Italia dhe Marina Ushtarake, por, në veçanti, për vigjilencën e demonstruar dhe përkushtimin e treguar sot, në mënyrë që kjo iniciativa e jonë, tashmë një çerek shekulli, të mund të mbetet e aftë dhe dhe adekuate, për të na ndihmuar të përballemi së bashku me sfidat tona të sigurisë në dimensionin detar.

Gjatë viteve, flotat tona janë angazhuar në shumë stërvitje, që synojnë përmirësimin e ndërveprueshmërisë sonë dhe kjo ka shërbyer si një motor efektiv për integrimin e 3 prej anëtarëve të ADRION në NATO. Megjithatë, mjedisi i sigurisë që ndryshon me shpejtësi, si në krahun lindor ashtu edhe atë jugor të Aleancës sonë, kërkon një qasje të re të vendosur.
Pellgu Adriatiko - Jonian ka qenë gjithnjë e më shumë një i mjedis i aksesueshëm për aktivitete malinje dhe është një nga pikat më të ndjeshme të transitit dhe infiltrimit për në zemër të Evropës. NATO dhe forcat aleate gjurmojnë në mënyrë rutinore anijet e flotës ruse në Mesdhe dhe ne i kemi parë ato të përgjojnë stërvitjet e NATO në Adriatik.

Po ashtu, kemi dëshmuar ndërhyrjet e aktorëve armiqësorë, duke kërkuar të degradojnë infrastrukturën tonë kritike, të ndërhyjnë në shërbimet tona qeveritare, të përftojnë informacione të inteligjencës, si dhe të pengojnë aktivitetet tona ushtarake nëpërmjet sulmeve kibernetike. Për më tepër, Evropa Juglindore mbetet një teatër i preferuar për palët e treta që synojnë të sfidojnë shoqëritë tona, normat dhe vlerat tona.

Koncepti Strategjik i NATO-s thekson rëndësinë e rajonit tonë për Aleancën. Në këtë kontekst, Shqipëria është e përkushtuar të investojë në kapacitete të reja dhe gatishmëri, në mënyrë që bashkarish të mund të ofrojmë siguri dhe stabilitet në Evropën Juglindore. Zona Adriatiko-Joniane është një nga rrugët kryesore ujore të lidhura me korridoret që shkojnë në lindje, kështu që bashkëpunimi rajonal është thelbësor për t’i mbajtur të hapura dhe të sigurta Linjat Detare të Komunikimimit (SLOC), si drejt ashtu brenda pellgut tonë.

Nga ana tjetër, po aq e rëndësishme është edhe infrastruktura e nevojshme detare që mundëson mbështetjen dhe lëvizjen e forcave ushtarake në pikat hyrëse të këtyre korridoreve. Për këtë qëllim, si pjesë e investimeve për modernizimin e infrastrukturës detare, po përfshijmë një kapacitet detar autonom në kompleksin tonë portual të Porto Romanos në Durrës, për të lehtësuar mbështetjen për forcat e NATO.

Përveç kësaj, fokusi ynë rajonal në lidhje me lëvizshmërinë e e trupave ushtarake dhe mallrave, siç është ai i nënshkruar gjatë Samitit të Uashingtonit për Korridorin VIII, ndihmon reagimin e forcave në mbështetje të mbrojtjes së Aleatëve të NATO kundër rreziqeve. Në këtë kontekst, është me rëndësi tejet të madhe që iniciativat e bashkëpunimit rajonale për sigurinë dhe mbrojtjen të mos mbeten instrumente të butë konsultimi, por të prodhojnë rezultate të prekshme operacionale dhe kapacitetesh.

Në kuadër të Marrëveshjes së re Taktike për "Evoluimi i Iniciativës ADRION”, Shqipëria mbështet në mënyrë aktive nevojën që Forcat tona Detare të intensifikojnë koordinimin dhe të unifikojnë linjën e përpjekjeve me MARCOM dhe Flotën e 6-të Amerikane (US 6th Fleet).

Shqipëria dhe Forca e saj Detare mbeten të përkushtuara për të kontribuar për t'u siguruar që linjat tona detare të komunikimit të jenë të hapura dhe të sigurta; që tregtia detare dhe infrastruktura nënujore të zhvillohen në mënyrë të sigurt; si dhe që pellgjet e Adriatikut dhe Jonit të mbeten të sigurta nga kërcënimet.

Faleminderit shumë! Grazie!