Fjala përshëndetëse e ministrit të Mbrojtjes z. Pirro Vengu për studentët e Akademisë së Forcave të Armatosura me rastin e fillimit të vitit të ri akademik

e mërkurë, 09 tetor 2024 13:04

Të dashur kolegë ministra,

i nderuar shefi i Shtabit,

gjeneralë, oficerë, nënoficerë, kadetë, familjarë, gjithashtu pedagogë të nderuar.

Është një emocion i veçantë në fakt dhe këtë po thoshim bashkë me Ogertën dhe një përgjegjësi e madhe, në fakt, t’i adresohesh kësaj trupe, e cila ka marrë me vendosmëri, por gjithashtu ka marrë edhe njëfarë risku, duke vendosur që të hyjë në një rrugë akademike ndryshe nga të tjerët, një rrugë akademike, e cila përmban jo vetëm përgatitjen nga ana mësimore, por përgatitjen fizike dhe, për më tepër dhe përgatitjen morale.

Përgatitjen morale sepse siç thoshte gjenerali Charles de Gaulle, ish - presidenti i Francës: "Kultura e gjithanshme në fakt është e vetmja shkollë komandimi" dhe, synimi që kemi bashkë me stafin akademik, me të cilin kemi ndërtuar një marrëdhënie të posaçme bashkëveprimi këtë muaj të fundit, është t'a kthejmë Akademinë e Forcave të Armatosura në një shkollë komandimi, e cila ofron edhe njohuritë më të fundit në programet e saj akademike, por ofron gjithashtu një karrierë të sigurt dhe një karrierë sfiduese me të gjitha avantazhet dhe benefitet, që sjell uniforma. Ç’është e vërteta, ndër vite, qeveria Rama ka mundësuar që uniforma të jetë ajo që nderohet dhe kjo uniformë të ketë gjithashtu jo vetëm përgjegjësi, por edhe benefitet që i takon, qoftë nga pikëpamja e pagës, qoftë nga pikëpamja e motivimit profesional dhe mbështetjes së familjeve të ushtarakëve tanë.

I përmend këto, sepse është padyshim një privilegj veshja e uniformës dhe janë të pakët ata, që e kanë këtë privilegj. Ne synojmë që të jenë edhe më shumë në të ardhmen, ndaj dhe do investojmë fuqishëm në mënyrë që akademia të hapet edhe më shumë në gjithë spektrin e njohurive bashkëkohore, padyshim për të investuar më shumë në teknologji informacioni dhe mbrojtje kibernetike, sikundër kemi biseduar me gjithë shtabin kohët e fundit, mënyrën më të mirë se si akademia t’i përgjigjet nevojave të Strategjisë Kombëtare të Mbrojtjes dhe Strategjisë Kombëtare të Industrisë Ushtarake. Ndaj dhe aty ku Akademia nuk mund të ofrojë kurrikula të caktuara, shumë të specializuara, së bashku me mbështetjen e Ministrisë së Arsimit dhe e falënderoj për pjesëmarrjen këtu, do synojmë që përmes universiteteve të tjera, lider në vend, të mundësojmë programe diplomimi të dyfishta për inxhinierë të specializuar, për inxhinierë armatimi, për inxhinierë prodhimi armatimi sikundër edhe për inxhinierë në fushën e Mbrojtjes Kibernetike, apo të teknologjive që i nevojiten forcave për të ushtruar plotësisht detyrën e tyre.

Ka ardhur momenti që Forcat e Armatosura në tërësi ta shohin përgjegjësinë e tyre përtej detyrave të mbrojtjes të integritetit të vendit dhe sovranitetit të vendit, të cilat janë parësore dhe do të vijojnë të mbeten të tilla. Ne së bashku me gjeneralët e shtabit dhe stafit pedagogjik të AFA kemi bindjen që Forcat e Armatosura mund të luajnë rolin e një skuadre, e cila përgatit burime njerëzore si kapacitet kombëtar, që i vlejnë kombit jo vetëm në FA, por edhe në fusha të tjera civile. Është shumë e rëndësishme që t'ju japim mundësinë në karrierën tuaj që të vijoni dhe karrierën civile dhe që të mund të riktheheni në FA dhe të keni një ecuri karriere të gjithanshme, sepse të gjitha vendet aktualisht, sidomos më të zhvilluara të NATO-s kanë krijuar një marrëdhënie shumë dinamike mes uniformës, zgjedhjes civile, rikthimit në uniformë sipas nevojave të atdheut në momente të caktuara.

Nuk kam shumë këshilla për tj'u dhënë përveç faktit që jam shumë mirënjohës për besimin që ju i tregoni këtij institucioni duke kërkuar të jeni kaq të shumtë për t'u regjistruar. Ç'është e vërteta, është bërë një punë, e rreptë në përzgjedhje, pasi kemi rritje të shumta të aplikimeve. E vetmja këshillë që do kisha është që siç familjet tuaja kanë investuar për t’ju sjellë këtu edhe juve ti bëni krenar në ecuritë tuaja akademike, profesionale dhe morale.

Ju faleminderit!

Ju priftë e mbara!