Fjala e plotë e ministrit të Mbrojtjes z. Pirro Vengu gjatë prezantimit të Buxhetit të Mbrojtjes për vitin 2026

I nderuar kryetar,
të nderuar kolege deputetë,

ka një dallim të madh mes një shteti që ecën me vizion dhe një shteti që mbahet peng nga mediokriteti. Shqipëria i ka provuar të dyja.

Kemi kaluar vite kur Mbrojtja u trajtua si një zyrë inventari, jo si themel i shtetit; si një faturë për t’u shmangur, jo si një prioritet kombëtar. Vite kur uniforma shihej si kosto, jo si garanci sigurie; kur arsenali shihej si mbetje e së shkuarës, jo si mjet për të mbrojtur të ardhmen.

Sot, kemi kaluar një kufi të rëndësishëm:

- midis një ushtrie që dikur mbahej me shpresë dhe që sot mbahet me investime;
- midis një industrie që dikur u çmontua dhe një industrie që sot po ringrihet;
- midis një vendi që dikur priste të tjerët dhe një vendi që sot respektohet për kontributin e vet.

Buxheti i Mbrojtjes 2026 do të mundësojë modernizimin e Forcave të Armatosura, ringritjen e industrisë ushtarake shqiptare, forcimin e emergjencave civile dhe rritjen e kontributit tonë në NATO dhe në sigurinë evropiane.

Ky besim nuk buron nga fjalët, por nga vetë përmasat dhe orientimi i këtij buxheti:

- Me një rritje prej 12% krahasuar me vitin 2025;
- Duke arritur 58,9 miliardë lekë, ose 2.12% të PBB.

Ky nuk është vetëm një numër që plotëson një kriter të NATO. Është një zgjedhje politike dhe strategjike: t’i japim Mbrojtjes peshën reale që meriton në projektin tonë për Shqipërinë e vitit 2030. Në zemër të këtij buxheti janë njerëzit tanë me uniformë. Plot 13 miliardë lekë shkojnë për ta:

- paga më të larta,
- kushte më të mira jetese e shërbimi,
- rekrutim më i gjerë dhe më cilësor.

Me këtë buxhet, ne nuk japim thjesht rroga. Ne japim dinjitet, japim besim. Ne u themi të rinjve dhe të rejave, që zgjedhin uniformën se shteti është me ta, jo vetëm me fjalë, por me buxhet.

Dhe në qendër të këtij vizioni qëndron ripërtëritja e kapitalit njerëzor. Synimi ynë është të forcojmë lidhjen mes Rinisë - forcat më të gjalla të vendit - dhe Forcave të Armatosura, si kapital njerëzor kombëtar. Do të orientojmë të rinjtë drejt mundësive profesionale civile brenda sistemit të Mbrojtjes, por edhe drejt shërbimit në uniformë, si në komponentin aktiv, ashtu dhe në trupën rezerviste. Po hapim karrierën ushtarake dhe atë të ekspertëve të Mbrojtjes Civile për profesionistët e rinj përmes kurrikulave inovative, në bashkëpunim me arsimin e lartë dhe botën akademike. Një politikë moderne burimesh njerëzore, që vendos në qendër aftësitë, disiplinën, vetëdijen historike dhe patriotizmin.

Një element i rëndësishëm i këtij orientimi është edhe kujtesa jonë historike. Po zbatojmë Planin Kombëtar të Rehabilitimit të Varrezave të Dëshmorëve dhe një program kombëtar për mirëmbajtjen e shenjave të kujtesës kolektive në të gjithë Shqipërinë.

Jam po aq i bindur se me këtë buxhet, gatishmëria e forcave tona bëhet e qëndrueshme, reale dhe e prekshme, sepse 16,3 miliardë lekë shkojnë drejtpërdrejt për detyrën dhe misionin e tyre të përditshëm.

- Nga helikopterët tek anijet.
- Nga uniformat tek municionet.
- Nga stërvitja, tek logjistika dhe mirëmbajtja.
- Nga jeta e ushtarakut në kazermë, tek detyra në terren dhe misionet jashtë vendit.

Çdo qindarkë është e lidhur me një kapacitet konkret, me një njësi konkrete, me një nevojë konkrete të Forcave të Armatosura.

Njëkohësisht, një pjesë thelbësore e këtij buxheti është e orientuar drejt së ardhmes. Plot 29 miliardë lekë janë investime kapitale - gjysma e buxhetit e përqendruar tek modernizimi, industria dhe teknologjia, që forcon shtetin.

Këto investime janë ura që lidhin sigurinë me zhvillimin ekonomik: infrastrukturë e re, teknologji moderne, projekte të përbashkëta me partnerët tanë strategjikë, por mbi gjithçka një filozofi e re: që Mbrojtja të mos jetë thjesht përdoruese buxheti, por krijuese vlere.

Po aq thelbësor është dimensioni i inovacionit dhe teknologjisë. Kompleksi kërkimor dhe industrial i Mbrojtjes po kalon në një fazë të re, ku inovacioni është detyrë parësore. Po ndërtojmë një ekosistem të plotë: nga Akademia te Industria, nga laboratorët te qendrat operative, që prodhon zgjidhje vendase dhe kapacitete të avancuara.

Paralelisht, Mbrojtja Kibernetike po shndërrohet në shtyllë të sigurisë kombëtare, ndërsa dixhitalizimi i njësive të luftimit do të pajisë çdo njësi me komunikim modern, sensorikë, komandim-kontroll dhe ndërveprueshmëri taktike. Një forcë që jo vetëm reagon, por edhe parashikon, ndërvepron dhe parandalon.

Shtylla kryesore e këtij buxheti, është industria “Made in Albania”, e cila po kthehet në realitet konkret:

- prodhim municionesh,
- dronë e sisteme anti-dron,
- pajime personale,
- mjete të blinduara.

Për herë të parë, Mbrojtja nuk është vetëm shpenzim, por edhe burim të ardhurash dhe zhvillimi, duke gjeneruar 326 vende të reja pune e duke rikthyer miliona në ekonomi si prodhim, si paga dhe si investime. Në këtë kontekst, dua të theksoj edhe një element të rëndësishëm në raportin tonë me Bashkimin Europian.

Edhe pse procesi i anëtarësimit nuk ka një kapitull të posaçëm për kapacitetet ushtarake, qëndrueshmëria, siguria dhe aftësia e shtetit për të menaxhuar krizat, janë të pranishme në të gjithë kapitujt e negociatave - nga infrastruktura kritike, te ekonomia, energjia, sundimi i ligjit, konkurrueshmëria, mbrojtja e kufijve dhe reagimi ndaj emergjencave. Pritshmëria e BE është e qartë: vendi që i afrohet anëtarësimit duhet të jetë një hallkë e fortë në zinxhirin e solidaritetit evropian, një kontribues aktiv në sigurinë dhe stabilitetin e përbashkët. Dhe politika jonë e Mbrojtjes Civile, e mbështetur nga ky buxhet, është pjesë thelbësore e këtij standardi evropian. 4,3 miliardë lekë janë parashikuar për emergjencat civile - siguria që prek çdo familje, në çdo bashki. Këtu përfshihen:

- dy qendra të reja rajonale për menaxhimin e emergjencave,
- dy avionë zjarrfikës për përballimin e zjarreve,
- investime në parandalim dhe reagim të shpejtë.

Të nderuar kolegë,

ky buxhet nuk është thjesht një dokument financiar. Ai është fotografia më e qartë e Shqipërisë që jemi sot dhe e Shqipërisë që duam të lëmë nesër. Një Shqipëri që nuk pret më, por ndërton; që nuk fshihet pas justifikimeve, por vepron. Të gjitha këto investime, gjithë ky modernizim, ringritja e industrisë dhe fuqizimi teknologjik e njerëzor i forcave janë dëshmi se shteti shqiptar po forcohet çdo ditë. Dhe kur shteti forcohet:

- forcohet siguria,
- forcohet ekonomia,
- forcohet besimi i qytetarëve te institucionet.

Ky buxhet është angazhimi ynë që Shqipëria të jetë më e përgatitur, më e mbrojtur dhe më e respektuar brenda NATO-s, në rajon dhe në sytë e qytetarëve të saj.

Ju faleminderit!