Fjalë e Ministrit të Mbrojtjes, z. Ermal Nufi në Ceremoninë e Diplomimit 2025-2026 të Kursit të Komandës dhe Shtabit të Përgjithshëm, dhe Kursit të Lartë të Oficerit

I nderuar Ambasador i Republikës së Kosovës, z. Durmishi,

I nderuar Gjeneral Kurti,

Të dashur kursantë dhe pjesëmarrës,

Përshëndetje të gjithëve!

Është kënaqësi dhe privilegj të jem sot mes jush në një ceremoni kaq domethënëse dhe kaq emocionuese.

Diplomimi nuk është asnjëherë një përfundim akademik, por është nisja e një investimi strategjik për të ardhmen.

Në rastin e sotëm - me diplomimin e Kursit të Komandës dhe Shtabit të Përgjithshëm (KKSHP), dhe Kursit të Lartë të Oficerit (KLO) - hidhen hapat e një investimi strategjik për lidershipin e ardhshëm të Forcave të Armatosura në funksion të mbrojtjes dhe sigurisë së vendit.

Prandaj sot, kjo ceremoni çel një tjetër kapitull në forcimin e kapaciteteve të Forcave tona të Armatosura.

Më lejoni të përgëzoj me zemër secilin prej 83 kursantëve që diplomohen sot – 7 prej cilëve janë nga Kosova jonë e dashur – për përkushtimin përgjatë këtij viti akademik.

Zgjedhja juaj për të investuar në dije na bën të gjithëve krenarë dhe besimplotë se e ardhmja jonë e përbashkët do të ketë më shumë vëmendje dhe do të jetë më e fortë.

Të nderuar të pranishëm,

Mjedisi i sigurisë në të cilin jetojmë është bërë më kompleks, më dinamik dhe më i paparashikueshëm se kurrë më parë.

Konfliktet konvencionale, kërcënimet hibride, sulmet kibernetike, zhvillimet e shpejta teknologjike dhe sfidat ndaj rendit ndërkombëtar krijojnë në çdo moment ushtarakë, të aftë të mendojnë në mënyrë strategjike, të bashkëpunojnë me aleatët dhe të marrin vendime të përgjegjshme për të ardhmen.

Pikërisht për këtë arsye, arsimi ushtarak nuk është thjesht një etapë që përfundon me marrjen e një diplome. Ai është një proces i vazhdueshëm që ndërton kulturën profesionale dhe përgatit drejtuesit për sfidat e së nesërmes.

Në këtë drejtim, si Ministër i Mbrojtjes i Republikës, më vjen mirë që Kolegji i Mbrojtjes dhe Sigurisë është sot një nga instrumentet më të rëndësishme për arritjen e këtij objektivi kombëtar.

Vit pas viti, roli i Kolegjit po konsolidohet si një qendër e lartë e edukimit profesional të ushtarakëve, duke përgatitur drejtues të aftë të kontribuojnë jo vetëm në nivel kombëtar, por edhe në misionet dhe strukturat shumëkombëshe të NATO-s.

Zhvillimi dhe forcimi i vazhdueshëm i kapitalit njerëzor, mbeten pa as më të voglin dyshim një prioritet shumë i rëndësishëm i qeverisë shqiptare.

Kapacitetet teknologjike, pajisjet moderne dhe infrastruktura në mbrojtje e siguri nuk mund të maten asnjëherë nëse pas tyre nuk qëndrojnë kapitale njerëzore që kanë dije të avancuara, me integritet dhe me dashuri për Atdheun.

Kjo është edhe vëmendja kryesore e Ministrisë së Mbrojtjes – fuqizimi i kapaciteteve njerëzore dhe aftësimit për t’iu përgjigjur konteksteve të reja të mbrojtjes dhe sigurisë.

Vizioni ynë është që Kolegji i Mbrojtjes dhe Sigurisë të zhvillohet dita-ditës si një institucion bashkëkohor, konkurrues dhe i lidhur ngushtë me akademitë më të mira ndërkombëtare dhe kolegjet homologe të vendeve aleate.

Nuk duhet të ndalim në asnjë moment përkushtimin për të investuar akoma më shumë në rritjen e cilësisë akademike, në zgjerimin e bashkëpunimit ndërkombëtar dhe në përafrimin me institucionet më të avancuara të edukimit ushtarak të vendeve të NATO-s dhe Bashkimit Evropian.

Me përfundimin me sukses të dy kurseve, më lejoni të shpreh mirënjohjen për partnerët tanë ndërkombëtarë, të cilët kanë vazhdimisht me ne përvojën, ekspertizën dhe praktikat më të mira, duke kontribuar në konsolidimin e këtij institucioni sipas standardeve të Aleancës.

Mirënjohje për drejtuesit, pedagogët dhe të gjithë stafin e Kolegjit të Mbrojtjes dhe Sigurisë për profesionalizmin dhe përkushtimin e treguar gjatë këtij viti akademik.

Falënderoj gjithashtu ambasadorët, ekspertët, drejtuesit e institucioneve dhe të gjithë lektorët e ftuar që gjatë këtij viti akademik, të cilët kanë ndarë përvojën dhe njohuritë e tyre me kursantët tanë.

Ndërkohë, në fund por jo më pak nga rëndësia - një aspekt që mua më bën të ndihem vërtet krenar, është fakti që në auditorët e Kolegjit, kanë studiuar gjithashtu oficerë të Forcave të Armatosura të Republikës së Shqipërisë dhe të Forcës së Sigurisë së Kosovës.

Ky fakt është produkt i lidhjes sonë vëllazërore dhe i bashkëpunimit të shkëlqyer që ekziston ndërmjet institucioneve tona me vizionin e përbashkët për ndërtimin e kapaciteteve profesionale në shërbim të sigurisë dhe mbrojtjes si të Shqipërisë ashtu edhe të Kosovës.

Kjo marrëdhënie dhe ky bashkëpunim nevojitet të zhvillohet edhe më tej në të ardhmen!

Të dashur kursantë, të diplomuar,

Ndërsa keni hapur sot një kapitull të ri të rrugëtimit tuaj profesional, ju inkurajoj fort të mos reshtni kurrë së mësuari dhe investuari tek vetja!

Dijet, përvoja dhe përgatitja profesionale janë garancia më e mirë për të përballuar dinamikat e një bote që ndryshon me ritme të shpejta.

Jam i bindur se do ta përfaqësoni me dinjitet institucionin tuaj, do t'i shërbeni me besnikëri vendit dhe do të kontribuoni në forcimin e sigurisë sonë kombëtare ashtu dhe të Aleancës.

Dhe teksa e mbyll fjalimin, dy fjalë që dalin nga zemra në këtë moment!

Shumë suksese të gjithë atyre që kanë vendosur një gur themeli karrierës personale. Është shumë e rëndësishme në Forcat e Armatosura të veprojnë si një trup, duke filluar nga Shefi i Shtabit të

Përgjithshëm e deri tek ushtari i fundit që është bashkuar dje në Forcat e Armatosura.

Urime dhe shumë suksese në rrugëtimin tuaj!

Faleminderit!