Fjala e Ministrit Nufi në Ceremoninë e 95-vjetorit të Shërbimit të Ndërlidhjes

I nderuar Shef i Shtabit të Përgjithshëm të Forcave të Armatosura, Gjenerallejtënant Kingji,

I nderuar Komandant i Komandës Kibernetike dhe Ndërlidhjes, Gjeneral Brigade Doda,

Të nderuar gjeneralë, oficerë, nënoficerë, punonjës civilë, ushtarë,

Të nderuar veteranë të Shërbimit të Ndërlidhjes, drejtorë të pranishëm!

Është një nder i veçantë të jem sot mes jush, në këtë ditë domethënëse, kur kremtojmë 95-vjetorin e krijimit të Shërbimit të Ndërlidhjes – njëra prej shtyllave më të rëndësishme mbi të cilat është ndërtuar dhe zhvilluar Forca jonë e Armatosur.

Në historinë e çdo ushtrie ka armë që japin fuqi, ka struktura që garantojnë organizimin, por ka edhe një element pa të cilin asnjë operacion nuk mund të realizohet, i cili është komunikimi.

Për 95 vjet, Shërbimi i Ndërlidhjes ka qenë pikërisht ai element që ka bashkuar njerëzit, strukturat dhe vendimmarrjen.

Ai ka garantuar që urdhri të mbërrijë në kohë, informacioni të jetë i besueshëm dhe misioni të përmbushet me sukses.

Sot, para së gjithash, dua të shpreh mirënjohjen më të thellë për të gjithë ata burra dhe gra, që ndër breza, kanë shërbyer në këtë shërbim me profesionalizëm, disiplinë dhe përkushtim.

Një falënderim i veçantë për veteranët, të cilët hodhën themelet e këtij institucioni; si dhe për efektivët që sot e mbajnë atë mbi supe dhe mbajnë përgjegjësinë e njërit prej misioneve më delikate të sigurisë tonë kombëtare.

Puna juaj zhvillohet shpesh larg vëmendjes së publikut. Megjithatë, rëndësia e saj është vendimtare. Ju jeni ata që siguroni vazhdimësinë e komandimit, besueshmërinë e komunikimit dhe mbrojtjen e sistemeve, mbi të cilat mbështetet funksionimi i Forcave të Armatosura.

Mjedisi i sigurisë, të nderuar të pranishëm, ka ndryshuar rrënjësisht.

Sot, epërsia nuk përcaktohet vetëm nga kapacitetet ushtarake tradicionale, por edhe nga aftësia për të mbrojtur informacionin, për të garantuar komunikimet dhe për të vepruar me shpejtësi në një hapësirë digjitale gjithnjë e më komplekse.

Hapësira kibernetike tashmë është një dimension i mirëfilltë i mbrojtjes. Kjo komandë, jo vetëm është një strukturë mbështetëse, por një komponent strategjik i të gjithë sigurisë tonë.

Çdo ditë, pa ndërprerje, ju garantoni funksionimin e sistemeve kritike, mbroni rrjetet tona nga kërcënimet kibernetike dhe krijoni kushtet që komandimi e kontrolli të funksionojnë me efikasitet, në çdo situatë dhe në çdo mision.

Si vend anëtar i NATO-s, Shqipëria ka një përgjegjësi të qartë dhe ambicie të mëdha.

Sot, sistemet tona të ndërlidhjes janë të ndërveprueshme me ato të Aleancës, duke mundësuar komunikim të sigurt dhe të besueshëm në çdo operacion të përbashkët. Ky është rezultat i profesionalizmit tuaj, por edhe i investimeve të vazhdueshme në modernizimin e teknologjive dhe zhvillimeve njerëzore.

Në këtë rrugëtim, shprehim mirënjohjen tonë për partneritetin tonë strategjik me Shtetet e Bashkuara të Amerikës, si edhe për të gjithë aleatët dhe partnerët që kanë mbështetur zhvillimin e kapaciteteve tona.

Falë këtij bashkëpunimi, kemi rritur standardet e trajnimit, kemi modernizuar infrastrukturën dhe kemi ndërtuar kapacitete, që sot janë plotësisht të integruara në arkitekturën e sigurisë së Aleancës.
Një vlerë të veçantë ka edhe bashkëpunimi me Qendrën e Ekselencës së NATO-s për Mbrojtjen Kibernetike, i cili na mundëson të përfitojmë nga praktikat më të mira ndërkombëtare, të marrim pjesë në stërvitje të avancuara dhe të forcojmë më tej aftësinë tonë për t'u përballur me sfidat e së ardhmes.

Të nderuar pjesëmarrës!

Modernizimi i Forcave të Armatosura mbetet një prioritet i palëkundur i Qeverisë Shqiptare.

Ne do të vijojmë të investojmë në teknologjitë më të avancuara, në infrastrukturë kritike dhe në zhvillimin e industrisë sonë të mbrojtjes, sepse siguria nuk ndërtohet vetëm me mjete, por me vizion, inovacion dhe partneritete të forta.

Investimi më i rëndësishëm mbetet gjithmonë njeriu!

Asnjë teknologji nuk mund të zëvendësojë profesionalizmin, integritetin dhe përkushtimin e grave dhe burrave që shërbejnë me dinjitet në Forcat tona të Armatosura për mbrojtjen dhe sigurinë.

Pikërisht për këtë arsye, do të vazhdojmë të investojmë në edukim, kualifikim dhe zhvillim profesional të efektivëve tanë, sepse kapitali njerëzor është garancia më e fortë e sigurisë sonë.
Të dashur efektivë të Shërbimit të Ndërlidhjes!

Ju jeni ura që lidh komandimin me veprimin; teknologjinë me sigurinë; përgjegjësinë me suksesin operacional!

Shërbimi juaj kërkon përgatitje, disiplinë, përkushtim të vazhdueshëm. Ai kërkon vigjilencë në çdo orë të ditës dhe të natës, dhe pikërisht për këtë arsye meritoni respektin dhe vlerësimin më të lartë të shtetit shqiptar.

Në këtë 95-vjetor, le të nderojmë historinë e këtij shërbimi krenar, të vlerësojmë kontributin e çdo brezi dhe të shohim me besim drejt së ardhmes.

Jam i bindur se me profesionalizmin tuaj, me mbështetjen e aleatëve tanë dhe me vizionin e modernizimit të Forcave të Armatosura - Shërbimi i Ndërlidhjes do të vazhdojë të mbetet një garanci nga më të fortat për sigurinë kombëtare dhe një histori suksesi për Shqipërinë.

Teksa ne në Ministrinë e Mbrojtjes kemi ndërmarrë disa hapa për zbatimin e teknologjive të reja, aktivizimin dhe zbatimin e sistemeve dhe rrjeteve të reja të komunikimit - unë dua t’ju garantoj sot që mbështetja jonë, si e Ministrisë së Mbrojtjes dhe Qeverisë Shqiptare është për gjithsecilin prej jush, personalisht, dhe si Shërbim i Ndërlidhjes.

Ndoshta, në shumë fjalime, disa fjalë edhe përsëriten, por këto fjalë që po them, i kam nga zemra dhe i kam për të gjithë ju që shërbeni në këtë shërbim.

Në qoftë se, ky shërbim kompromentohet, e gjithë puna e Forcave të Armatosura, kompromentohet gjithashtu. Në qoftë se ky shërbim nuk është në lartësinë e duhur, operacionaliteti, funksionaliteti i të gjithë sistemeve të tjera është prapë në dyshim.

Kritikaliteti i operacioneve që ne kryejmë, rëndësia e informacionit që transmetohet në mënyrë të sigurt është jetike dhe kritike, prandaj vëmendja ndaj këtij Shërbimi, nderimi ndaj punës së tyre është maksimal.

Prandaj, mbështetja e Ministrisë së Mbrojtjes dhe të gjithë stafeve, Shefit të Shtabit të Përgjithshëm gjithashtu, me të cilin kemi diskutuar disa herë zbatimin e të gjithë shërbimeve, mbetet maksimale dhe këtë jua garantoj.

Urime 95-vjetorin, Shërbim i Ndërlidhjes!

Ju uroj shëndet, mbarësi në çdo mision!

Faleminderit!