Fjala e Ministrit të Mbrojtjes, z. Ermal Nufi në Ceremoninë e Diplomimit të 67 oficerëve të rinj të Kursit të Përgatitjes së Oficerëve në Akademinë e Forcave të Armatosura

I nderuar z. Kryeministër,

E nderuar Ministre e Arsimit, znj. Kumbaro

I nderuar Ministër Maqedonci,

Mirë se erdhët sot dhe kënaqësi t’ju kemi këtu në Tiranë!

I nderuar Shef i Shtabit të Përgjithshëm, Gjenerallejtënant Kingji,

Gjeneralmajor Dimo,

Shkëlqesi, Ambasador z. Durmishi,

Të nderuar gjeneralë, komandantë, oficerë, atashe ushtarakë,

Të nderuar pedagogë, instruktorë, personel akademik, familjarë të ftuar,

Të nderuar kadetë!

Sot, Shqipëria fiton sot një brez të ri oficerësh – një brez të ri udhëheqësish, të përgatitur mirë për t’i shërbyer Atdheut, për t’i shërbyer qytetarëve, për ta përfaqësuar me dinjitet flamurin shqiptar kudo ku detyra fisnike e kërkon.

67 oficerët e rinj, 10 prej të cilëve nga Kosova, i uroj përzemërsisht për përfundimin me sukses të Kursit 1-vjeçar të Përgatitjes së Oficerëve.

Kjo ditë është e veçantë për Akademinë e Forcave të Armatosura, institucioni i vetëm i arsimit të lartë me status të veçantë në fushën e sigurisë dhe mbrojtjes, i cili ka mision pikërisht të formësojë oficerët e së ardhmes. Prej mbi 5 vjetësh tashmë, Akademia e Forcave të Armatosura me mbështetjen e pakursyer të qeverisë shqiptare dhe partneritetin e ngushtë me aleatët tanë ndërkombëtarë, ka hyrë në një rrugë të pandalshme transformimi dhe zhvillimi.

Akademia sot, është shumë më tepër se një institucion arsimor - është një vend ku formohen udhëheqës me karakter, integritet dhe profesionalizëm, të frymëzuar nga vlerat e Detyrës, Nderit dhe Atdheut.

Ndaj bindjen se investimi në dije është i vetmi investim i drejtpërdrejtë në sigurinë tonë të përbashkët dhe në të ardhmen euroatlantike. Prandaj, edhe oficerët e rinj që diplomohen sot nuk mbajnë vetëm një gradë ushtarake, por mbi të gjitha mbajnë besimin e një kombi – një besim që mbart një vlerë më shumë se kurrë në një kohë ku mjedisi i sigurisë po ndryshon shumë shpejt dhe është më dinamik, si asnjëherë më përpara.

Më lejoni të shpreh sot mirënjohjen time më të sinqertë për të gjithë pedagogët dhe instruktorët e Akademisë së Forcave të Armatosura, të cilët kanë formësuar këtë brez të ri oficerësh, sikurse edhe më përpara.

Një falënderim i veçantë sot është për familjarët e këtyre kadetëve, të cilët i kanë mbështetur ata përgjatë gjithë këtij rrugëtimi. Unë sot dua të falënderoj në mënyrë të veçantë Kryeministrin e Republikës, Ministren e Arsimit dhe patjetër Ministrin Maqedonci për prezencën e tyre.

Besoj që prezenca e tyre sot është simbolike për të treguar jo vetëm mbështetjen e Qeverisë Shqiptare, patjetër edhe të Qeverisë së Kosovës për këta kadetë, por edhe për të lënë një shenjë në memorien e tyre, për të kujtuar ditën kur betimi u bë, ditën kur vendimi u mor, ditën kur jeta u nda në shërbim të Forcave të Armatosura të Republikës.

Është një ditë e veçantë, një ditë që nuk harrohet lehtë dhe për këtë, ne të gjithë jemi shumë krenarë dhe i urojmë shumë suksese të gjithë këtyre kadetëve!

Mbarësi dhe mbajeni me nder betimin që do të bëni sot!

Nderoni Atdheun, nderoni flamurin!

Faleminderit!