Fjala përshëndetëse e Ministrit të Mbrojtjes, z. Ermal Nufi, nënshkruhet Memorandumi i Bashkëpunimit mes KAYO, FINCANTIERI dhe Shkollës Industriale "Pavarësia"

Për mua personalisht është një ditë shumë emocionuese!

Shumë vite më përpara, në vitin 2023 kur Kryeministri i Republikës më dha nderin që të përfshihesha në projektin e kërkimit të një institucioni për industrinë ushtarake – vizioni, ëndrra dhe dëshira e tij ishte kjo ditë që ne jemi sot.

Jo vetëm që të përmbushim kapacitetet e Forcave të Armatosura, por të gjenerojmë ekonominë, të gjenerojmë punësim dhe t’i japim një jetë të re kujtdo të riu në Republikën e Shqipërisë.
Ky aktivitet sot është përmbushja e këtij vizioni të Kryeministrit. Është përmbushja e të gjithë përpjekjeve tona nga viti 2023 deri më sot - që të rivitalizojmë industrinë ushtarake dhe të forcojmë partneritetet, në mënyrë që jo vetëm të kemi pra, kapacitete ushtarake, por të kemi dhe të rinj, të reja të përgatitur, që e shtyjnë përpara jo vetëm industrializimin e Republikës, por edhe punësimin, jetën sociale, të gjithë benefitet që vijnë nga një partneritet i tillë ekonomik.

Fakti që në këtë partneritet e kemi me FINCANTIERI-n, është një vlerë e shtuar, një ngjarje e jashtëzakonshme. Kur i thoja Presidentit, kur erdhi në fillim që baza e Pashaliman-it ka qenë një nga portet më të lashta. Ne kemi në krah Parkun Arkeologjik dhe është dëshmi e qartë që romakët dikur përdornin pikërisht këtë port për aktivitetet e tyre.

Sot, ne bashkë me italianët përsëri, po ndërtojmë një partneritet të qëndrueshëm dhe kjo është një ditë që na bën krenarë, jo vetëm pikërisht për ato kapacitete ushtarake dhe teknologjike që i shtojmë në Republikë, por edhe për të ndërtuar një miqësi midis dy shteteve, midis dy popujve dhe midis dy brezave të rinj, që në fakt është një urë bashkëpunimi zgjat në kohë.

Unë shpreh mirënjohjen time për të gjithë kolegët që kanë punuar për realizimin e këtij projekti: Ministrinë e Mbrojtjes, Shtabin e Përgjithshëm, Bordin e KAYO-s, partnerët e FINCANTIERI-t.

Mirënjohje dhe shumë suksese këtij bashkëpunimi ndërmjet kësaj kompanie dhe shkollës “Pavarësia” në Vlorë, e cila është, për mendimin tim dhe në vlerësimin tim, jo vetëm vlerë e shtuar për qytetin e Vlorës, por është një gurthemel i një brezi të ri, i një ekonomie të re dhe një mundësie të re për këtë vend.

Faleminderit!