Konferencë për Media – fjala hyrëse e Ministrit të Mbrojtjes, z. Ermal Nufi

Të dashur përfaqësues të medias,

Përshëndetje të gjithëve!

Faleminderit për praninë dhe mirë se erdhët në këtë takim të parë tonin nëpërmjet një konference – që po shpresoj ta kanalizojmë edhe si një urë komunikimi periodike me qëllim që të përcjellim angazhimet tona institucionale, punët që po bëhen dhe ato që na presin, si dhe të informojmë nëpërmjet jush publikun për tema apo çështje që prekin vendin tonë.

Jam bashkë me Shefin e Shtabit të Përgjithshëm të Forcave të Armatosura, Gjenerallejtënant z. Arben Kingji; Drejtorin e Agjencisë Kombëtare të Mbrojtjes Civile, z. Haki Çako; dhe Administratorin e Kompanisë Shtetërore “KAYO”, z. Ardi Veliu – në mënyrë që bashkërisht të kemi mundësi edhe t’ju përgjigjemi pyetjeve që mund të keni rreth aktualitetit që prekin Ministrinë e Mbrojtjes.
Më lejoni shkurtimisht të bëj një hyrje të shkurtër rreth angazhimeve kryesore të Ministrisë së Mbrojtjes – me fokus tek:

• partneriteti unë i palëkundur si shtet aleat në NATO;

• angazhimit dhe modernizimit të forcave tona të armatosura;

• marrëveshjes më të fundit mes KAYO dhe FINCANTIERI;

• si dhe masave të ndërmarra për menaxhimin e emergjencave civile në prag të nisjes së sezonit veror.

Angazhimi ynë mbetet i qartë dhe i pandryshueshëm: forcimi i kapaciteteve mbrojtëse, rritja e ndërveprueshmërisë me NATO-n dhe BE-në, si dhe përmbushja e detyrimeve tona në kuadër të sigurisë kolektive.

Në këtë kontekst, Forcat e Armatosura të Republikës së Shqipërisë mbeten një nga shtyllat themelore të sigurisë kombëtare dhe një kontribuues i rëndësishëm në sigurinë rajonale dhe ndërkombëtare.

Aktualisht, Forcat e Armatosura të Republikës së Shqipërisë kontribuojnë me rreth 250 efektivë në misione, operacione dhe aktivitete jashtë vendit, në kuadër të partneritetit të NATO-s, Bashkimit Evropian dhe Organizatës së Kombeve të Bashkuara (OKB).

Ky angazhim është dëshmi e qartë e besueshmërisë së Shqipërisë si aleat dhe partner, si dhe e profesionalizmit të personelit tonë ushtarak në operacione shumëkombëshe.
Një prioritet i rëndësishëm i punës sonë është edhe zhvillimi i bashkëpunimit dypalësh, rajonal dhe në kuadër të NATO-s.

Forcat tona të Armatosura luajnë një rol aktiv në forcimin e sigurisë dhe stabilitetit në rajon, përmes diplomacisë ushtarake dhe angazhimeve të përbashkëta me partnerët tanë strategjikë.

Në këtë kuadër, stërvitjet e planifikuara dhe të vlerësimit operacional, si “Mburoja e Arbrit 2026” dhe “Mburoja Ilire 2026”, përbëjnë hapa të rëndësishëm në rritjen e gatishmërisë dhe ndërveprueshmërisë sipas standardeve të NATO-s.

Ne do të vijojmë angazhimin tonë në operacionet dhe stërvitjet e drejtuara nga Aleanca, duke synuar rritjen graduale të kapaciteteve, përfaqësimit dhe kontributit tonë në mbrojtjen kolektive.
Pa dyshim, që modernizimi i Forcave tona të Armatosura mbetet një nga prioritetet strategjike.

Investimet janë përqendruar në kapacitete me ndikim të drejtpërdrejtë operacional, në përputhje me objektivat e NATO-s dhe nevojat e sigurisë kombëtare.
Fokusi ynë përfshin:

- sistemet e mbrojtjes ajrore me rreze të shkurtër dhe të mesme;
- sistemet dronë dhe kundër-dronë;
- kapacitetet e mbrojtjes kibernetike;
- fuqinë e zjarrit të artilerisë;
- mjetet taktike dhe të blinduara;
- sistemet e komunikimit dhe informacionit;
- si dhe nxitjen e inovacionit në fushën e mbrojtjes.

Ky proces po zhvillohet në bashkëpunim të ngushtë me aleatët tanë në NATO dhe partnerët strategjikë.

Burimet njerëzore janë prioritet absolut – element kyç i forcës sonë.

Pa një trupë të motivuar dhe të mirë-trajnuar, nuk mund të kemi Forca të Armatosura efektive.

Në këtë drejtim, synimi ynë është:
- rekrutimi dhe mbajtja e personelit cilësor;
- zhvillimi i karrierës mbi bazën e meritës;
- përmirësimi i arsimit dhe stërvitjes ushtarake;
- dhe forcimi i lidershipit në të gjitha nivelet e komandimit.

Nga të dhënat më të fundit që kemi – kemi evidentuar një rritje të ndjeshme të interesit për t’u bërë pjesë e Forcave të Armatosura.

Vetëm në dy vitet e fundit, rekrutimet janë rritur me rreth 90%, ku një pjesë e konsiderueshme e aplikantëve janë me arsim të mesëm dhe të lartë; ndërsa pjesëmarrja e grave arrin në 12–13% për çdo fazë rekrutimi.

Prioritet tjetër strategjik është qëndrueshmëria e mbrojtjes kombëtare. Kjo nënkupton aftësinë për të funksionuar në mënyrë të pandërprerë, për të reaguar në kohë dhe për të rikuperuar efektivisht përballë çdo sfide - qoftë ajo institucionale, logjistike apo operacionale.

Ndërkohë, një prej zhvillimeve të rëndësishme strategjike kohët e fundit është bashkëpunimi industrial në fushën e mbrojtjes dhe industrisë detare.

Marrëveshja midis shoqërisë “KAYO” dhe liderit ndërkombëtar të kompanisë italiane “FINCANTIERI” shënon një hap të rëndësishëm drejt modernizimit të industrisë sonë të mbrojtjes.

Ky partneritet hap rrugën për prodhimin në Shqipëri të mjeteve lundruese detare, si për nevojat kombëtare, ashtu edhe për tregjet ndërkombëtare.
Projekti parashikon:

- krijimin e një kantieri të ri në Pashaliman;
- punësimin e rreth 400 qytetarëve;
- zhvillimin e aftësive teknologjike dhe profesionale të të rinjve;
- dhe kthimin e Shqipërisë në një bazë të rëndësishme europiane për ndërtimin e anijeve të vogla dhe të mesme.

Ky është një investim me rëndësi strategjike, jo vetëm për mbrojtjen, por edhe për zhvillimin ekonomik dhe industrial të vendit.

Meqë jemi edhe në prag të nisjes së sezonit veror, ku përvoja e viteve të kaluara ka treguar edhe angazhimin e pandërprerë të kapaciteteve tona në përballimin dhe menaxhimin e emergjencave civile – më lejoni shkurtimisht të ndaj edhe disa prej masave të ndërmarra në këtë drejtim.

Janë forcuar strukturat në nivel qarku, si dhe është rritur bashkërendimi ndërinstitucional dhe janë përditësuar planet e reagimit.
Gjithashtu:

- janë identifikuar zonat me risk të lartë;
- është forcuar monitorimi në terren;
- është përforcuar koordinimi me Policinë e Shtetit;
- dhe janë rritur kapacitetet njerëzore dhe teknike.

Kemi edhe një rritje të fondit për mbrojtjen civile, i cili në vitin 2025 ka qenë 800 milion lekë; ndërsa për vitin 2026 është parashikuar të arrijë në 1 miliard lekë.

Paralelisht, nuk janë ndalur në asnjë moment trajnimet dhe stërvitjet në përputhje me standardet e Mekanizmit Evropian të Mbrojtjes Civile.

Duke ju falënderuar sërish për vëmendjen dhe praninë tuaj, preferoj të mos zgjatem më tepër, por të marrim edhe pyetjet tuaja në lidhje me çështje që prekin përditshmërinë e punëve të Ministrisë e Mbrojtjes.

Me bashkëpunëtorët që kam në këtë tryezë, do të bëjmë më të mirën për të adresuar pyetjet tuaja.

Faleminderit edhe njëherë për vëmendjen!