Forcat e Armatosura dhe Garda Kombëtare e Nju Xhersit, një çerek shekulli partneritet – fjala përshëndetëse e Ministrit të Mbrojtjes, z. Ermal Nufi

I nderuar President i Republikës së Shqipërisë,

E nderuar mike, Zonja Van Horn,

I nderuar Gjeneral Brigade Mays,

I nderuar Gjenerallejtënant Kingji dhe të gjithë Gjeneralët,

Të nderuar oficerë, nënoficerë dhe ushtarë të pranishëm,

Të dashur miq,

Sot është një ditë krenarie për ne!

Një moment i veçantë ku shënojmë 25 vite të një partneriteti të qëndrueshëm dhe të suksesshëm mes Forcave të Armatosura të Republikës së Shqipërisë dhe Gardës Kombëtare të Nju Xhersit, si dhe një mundësi për të reflektuar mbi rrugëtimin tonë të përbashkët dhe për të parë me besim drejt së ardhmes.

Shqipëria është krenare për partneritetin e saj strategjik me Shtetet e Bashkuara të Amerikës — një nga shtyllat kryesore të politikës sonë të jashtme dhe të sigurisë.

Ne mbetemi thellësisht mirënjohës për mbështetjen e vazhdueshme dhe vendimtare të SHBA-së, e cila ka qenë thelbësore për forcimin e sigurisë sonë, modernizimin e Forcave të Armatosura dhe konsolidimin e rolit tonë.

Në këtë frymë, 25 vite më parë nisi bashkëpunimi ynë me Gardën Kombëtare të Nju Xhersit — një partneritet që sot përfaqëson një nga historitë më të suksesshme të Programit të Partneritetit Shtetëror.

Këto 25 vite nuk janë thjesht një kronologji aktivitetesh. Ato përfaqësojnë një histori besimi, miqësie dhe vlerash të përbashkëta — demokracisë, lirisë dhe angazhimit për sigurinë.

Gjatë këtij rrugëtimi kemi ndërtuar së bashku kapacitete reale dhe të qëndrueshme:

• nga zhvillimi i trupës së nënoficerëve, që sot është një nga shtyllat më të rëndësishme të Forcave tona;
• tek edukimi dhe formimi i oficerëve të rinj;
• nga bashkëpunimi në mjekësinë ushtarake dhe menaxhimin e emergjencave civile;
• tek përvoja e përbashkët në misione ndërkombëtare, përfshirë Afganistanin;
• si dhe zhvillimi i kapaciteteve në fusha të reja si mbrojtja kibernetike.

Këto arritje kanë ndikuar drejtpërdrejt në rritjen e profesionalizmit, gatishmërisë, ndërveprueshmërisë dhe modernizimit të Forcave tona të Armatosura.

E dashur Gjeneral Mays,

Më lejoni të shpreh mirënjohjen time të sinqertë për lidershipin tuaj, si dhe për përkushtimin e grave dhe burrave të Gardës Kombëtare të Nju Xhersit, të cilët kanë kontribuar në këtë partneritet gjatë këtyre 25 viteve.

Sot, përballë një mjedisi sigurie gjithnjë e më kompleks, jemi të vetëdijshëm se bashkëpunimi ynë duhet të thellohet edhe më tej.

Mbrojtja kibernetike mbetet një prioritet i dorës së parë për Shqipërinë. Përballë kërcënimeve të vazhdueshme në këtë fushë, mbështetja dhe ekspertiza e Shteteve të Bashkuara janë thelbësore për forcimin e qëndrueshmërisë sonë dhe mbrojtjen e institucioneve tona.

Njëkohësisht, zhvillimi i mëtejshëm i trupës së nënoficerëve mbetet një investim kyç për lidershipin e së ardhmes dhe për forcimin e strukturës sonë ushtarake.

Ne kemi bërë progres të rëndësishëm edhe me Grup-Batalionin e Këmbësorisë së Lehtë, i cili po përgatitet për vlerësimin e gatishmërisë nga NATO. Në këtë drejtim, stërvitjet e përbashkëta dhe rritja e ndërveprueshmërisë mbeten thelbësore.

Një tjetër prioritet strategjik është Baza Ajrore e Kuçovës, një aset i rëndësishëm për NATO-n dhe për sigurinë rajonale. Jemi të angazhuar që ta bëjmë atë plotësisht funksionale dhe një vlerë të shtuar për Aleancën.

Në këtë kuadër dhe në kuadër të NATO-s, Shqipëria është e ndërgjegjshme për përgjegjësitë e saj si aleate. Ne mbështesim ndarjen e drejtë të barrës dhe duke filluar nga viti 2026, do të kontribuojmë edhe financiarisht në aktivitetet e përzgjedhura të këtij partneriteti — si një shenjë pjekurie.

Duke parë drejt së ardhmes, ne shohim hapësira të reja për të zgjeruar bashkëpunimin tonë, përfshirë edhe iniciativa rajonale dhe trajnime të përbashkëta që forcojnë sigurinë dhe bashkëpunimin në rajon.

Të dashur miq,

Ky partneritet nuk është vetëm për atë që kemi arritur në këto 25 vite, por mbi të gjitha për atë që do të ndërtojmë së bashku në të ardhmen.

Jemi krenarë për këtë rrugëtim të përbashkët dhe të vendosur për ta çuar më tej këtë bashkëpunim në nivele edhe më të larta.

Dear General Mays, we highly value this partnership and look forward to deepening our cooperation even further in the years ahead.

Faleminderit!