Fjala përshëndetëse e Ministrit të Mbrojtjes, z. Ermal Nufi

I nderuar Gjenerallejtënant z. Kingji,

I nderuar z. Çako, Drejtor i Emergjencave Civile,

I nderuar Gjeneral z. Pando,

Gjeneralë, oficerë, të ftuar,

Të nderuar efektivë të Forcave të Armatosura të Republikës së Shqipërisë dhe përfaqësues të Agjencisë Kombëtare të Mbrojtjes Civile,

Sot, në këtë rreshtim të forcave dhe kapaciteteve të angazhuara në Mekanizmin Kombëtar të Mbrojtjes Civile, ne përcjellim një mesazh të qartë për qytetarët shqiptarë. Republika e Shqipërisë është e përgatitur, më e koordinuar, më e aftë për të përballuar emergjencat civile dhe veçanërisht sezonin e zjarreve që kemi përpara.

Sezoni i zjarreve të vitit 2025 ishte një nga periudhat më intensive dhe më të zgjatura të viteve të fundit. Ai u karakterizua nga një intensitet i lartë, shtrirje e gjerë territoriale dhe angazhim i njëkohshëm i shumë strukturave operacionale në të gjithë vendin.

Gjej rastin sot që t’ju falënderoj të gjithëve ju për punën e jashtëzakonshme që keni bërë vitin e shkuar; strukturat drejtuese të Komandës Mbështetëse; të Shtabit të Përgjithshëm; të Agjencisë Kombëtare të Mbrojtjes Civile; paraardhësin tim, Pirron Vengun, për të gjithë koordinimin, për të gjithë punën që është bërë dhe që na keni bërë të gjithëve të ndihemi krenarë, edhe ne që nuk ishin në atë kohë pjesë e Ministrisë së Mbrojtjes - për sakrificën, përkushtimin, mundin. Është më tepër se e vlerësuar! Është më tepër se mirënjohje! Është më tepër se respekt!

Përvoja e vjetshme tregoi qartë se Emergjencat Civile kërkojnë jo vetëm reagim të shpejtë, por mbi të gjitha koordinim të fortë institucional, kapacitete moderne, investim të vazhdueshëm në gatishmëri.

Pikërisht për këtë arsye, Ministria e Mbrojtjes, ka vijuar me prioritet forcimin dhe modernizimin e sistemeve të mbrojtjes civile, duke konsoliduar rolin koordinues të AKMC-së, rritjen e efikasitetit të njësive të Forcave të Armatosura të Republikës, të angazhuara në menaxhimin e emergjencave.

Gjatë kësaj periudhe janë zhvilluar mbledhjet e Komisioneve të Mbrojtjes Civile në të gjitha qarqet e vendit, me fokus të veçantë: masat parandaluese, identifikimin e zonave me rrezikshmëri të lartë, përditësimin e planeve të reagimit dhe forcimit të bashkëpunimit ndërinstitucional.

Njëkohësisht, është rritur ndjeshëm mbështetja për njësitë e vetëqeverisjes vendore, me një financim prej rreth 800 milionë lekësh për vitin 2025 dhe mbi 1 miliard për vitin 2026.
Paralelisht me investimin në nivel qendror, ka vijuar modernizimi i kapaciteteve të Forcave të Armatosura të Republikës së Shqipërisë dhe në mënyrë të veçantë, të Bazës së Mbështetjes të Emergjencave Civile, ku ndodhemi sot.

Sot, ju jeni të kompletuar me pajisjet më moderne në përballimin e të gjitha llojeve të operacioneve emergjente e në veçanti, të zjarreve. Po ashtu, po ndërtohen kapacitete të reja të specializuara, përfshirë ekipet K9 për kërkim-shpëtim, si dhe kapacitetet për rehabilitimin e infrastrukturës së situatave emergjente, së bashku me modernizimin e Bazës së Mbështetjes të Emergjencave Civile dhe projektit strategjik të detashmentit të mbështetjes rajonale, i cili mbështetet në konceptin “Host Nation Support”.

Të gjitha këto investime tregojnë qartë së nuk po ndërtojmë vetëm kapacitete për një sezon, por një sistem modern të qëndrueshëm dhe afatgjatë të mbrojtjes civile, në përputhshmëri me standardet e Bashkimit Evropian dhe Mekanizmit Evropian të Mbrojtjes Civile.

Në këtë kuadër, vijon puna për krijimin e databazës kombëtare të kapaciteteve operacionale dhe implementimit të numrit unik evropian të emergjencës, 112-shit, si pjesë e modernizimit të mëtejshëm të sistemeve të reagimit ndaj emergjencave. Të gjitha këto masa kanë një qëllim të vetëm: garantimin e sigurisë të qytetarëve, mbrojtjen e jetës, pronës dhe mjedisit.

Në përmbyllje, dëshiroj të shpreh mirënjohjen time më të thellë për efektivët e Bazës së Mbështetjes të Emergjencave Civile, Forcën Tokësore, Forcën Ajrore, për Agjencinë Kombëtare të Mbrojtjes Civile, si dhe për të gjitha njësitë dhe strukturat e angazhuara në mekanizmin e mbrojtjes civile, të cilat janë në gatishmëri të plotë në çdo kohë.

Faleminderit për përkushtimin, profesionalizmin, sakrificën tuaj në shërbim të qytetarëve!

Dhe një thirrje e fundit për të gjithë qytetarët e Republikës që të tregojmë përgjegjësi, kujdes dhe ndërgjegjësim në çdo veprim të përditshëm, të bashkëpunojmë ngushtë me institucionet që raportojnë çdo rrezik në kohë reale!

Mbrojtja civile nuk është detyrë vetëm e forcave të rreshtuara sot, por është detyrë kolektive e të gjithë qytetarëve.

Së bashku, ndërtojmë më shumë siguri, së bashku garantojmë më shumë mbrojtjen e jetës dhe të vendit tonë!

Ju faleminderit!