Ceremonia e ndërrimit të Komandantëve të Akademisë së Forcave të Armatosura – fjala përshëndetëse e Ministrit të Mbrojtjes, z. Ermal Nufi

I nderuar Shef i Shtabit të Përgjithshëm, Gjenerallejtënant Arben Kingji,

Të nderuar gjeneralë dhe oficerë,

I nderuar Gjeneral Brigade Bardhyl Nuredinaj,

I nderuar Gjeneral Major Ferdinand Dimo,

Të nderuar pedagogë, studentë dhe të ftuar,

Përshëndetje të gjithëve!

Sot shënojmë një kapitull të rëndësishëm në jetën institucionale të Akademisë së Forcave të Armatosura, i cili bën bashkë vlerësimin për punën e kryer me përgjegjësinë për të vijuar më tej transformimin e arsimit ushtarak shqiptar.

Më lejoni që në emër të Ministrisë së Mbrojtjes, të shpreh mirënjohjen dhe vlerësimin tim për Gjeneral Brigade Bardhyl Nuredinaj për drejtimin serioz dhe kontributin e tij në krye të Akademisë së Forcave të Armatosura.

Përgjatë kësaj periudhe, institucioni ka njohur zhvillime të rëndësishme në konsolidimin akademik, forcimin e kërkimit shkencor dhe avancimin e projekteve infrastrukturore.
Akreditimi i Akademisë vitin e kaluar përbën një arritje të rëndësishme institucionale – duke dëshmuar seriozitetin, standardet dhe cilësinë e punës së bërë nga stafi akademik dhe drejtuesit e këtij institucioni.

Po aq domethënës është edhe progresi i bërë për kampusin e ri të Akademisë, i cili do të mikpresë studentët vitin e ardhshëm akademik - një investim strategjik për të ardhmen e arsimit ushtarak dhe për standardet që synojmë të arrijmë si vend anëtar i NATO.

Ndaj bindjen se përvoja e Gjeneral Nuredinaj do të vazhdojë t’i shërbejë Ministrisë së Mbrojtjes dhe Forcave të Armatosura me të njëjtin përkushtim edhe në detyrën e re si këshilltar i Ministrit të Mbrojtjes.

Njëkohësisht, më lejoni ta uroj përzemërsisht dhe shumë suksese ndaj Gjeneral Major Ferdinand Dimos në detyrën e re si Komandant i Akademisë së Forcave të Armatosura që në fakt është një përgjegjësi më rëndësi të veçantë strategjike.

Sepse Akademia e Forcave të Armatosura, nuk ka vetëm misionin e formimit profesional të oficerëve tanë, por mbart në vetvete:

- peshën e prodhimit të dijes;
- kultivimit të mendimit strategjik në kohë komplekse;
- forcimit të kulturës së sigurisë;
- dhe zhvillimit të kapaciteteve të lidershipit për Forcat tona të Armatosura.

Të nderuar pjesëmarrës,

Sfidat e reja të sigurisë kërkojnë institucione moderne, dinamike dhe të afta për t’u përshtatur me realitetet strategjike që ndryshojnë me shpejtësi. Pikërisht për këtë arsye, arsimi ushtarak duhet të jetë në pararojë të zhvillimeve të Forcave të Armatosura.

Një ushtri moderne nuk ndërtohet vetëm me teknologji apo pajisje bashkëkohore. Ajo ndërtohet mbi dije, profesionalizëm, integritet dhe lidership.

Akademia e Forcave të Armatosura duhet të jetë qendra ku formohen oficerët e së nesërmes — oficerë të aftë për të komanduar, për të menduar në mënyrë strategjike dhe për t’u përballur me sfidat komplekse të sigurisë moderne – sikurse duhet të konsolidohet sistematikisht si qendër e rëndësishme edhe e kërkimit shkencor në vend.

Ne jemi më se të vendosur që mos të ndalim në asnjë moment ritmin për modernizimin e sistemit të arsimit ushtarak.

Në bashkëpunim të ngushtë edhe me Ministrinë e Arsimit dhe partnerët tanë euroatlantikë, do të çojmë përpara vizionin e ndërtimit të një sistemi ushtarak cilësor, konkurrues dhe plotësisht të ndërveprueshëm me standardet e NATO-s dhe të Bashkimit Evropian.

Kërkimi shkencor, inovacioni dhe zhvillimi i kapaciteteve njerëzore do të kenë një rol gjithnjë e më të rëndësishëm. Për këtë arsye, do të keni mbështetjen time të plotë dhe të ministrisë që drejtoj - për çdo reformë dhe iniciativë që forcon cilësinë e arsimit ushtarak dhe rrit kapacitetet profesionale të Forcave tona të Armatosura.

E ardhmja e Forcave tona të Armatosura është gjithmonë SOT – bashkë me ju në çdo auditor, laborator dhe kapitalet njerëzore që formohen në këtë akademi fort të respektuar.
Suksese bashkërisht dhe faleminderit për vëmendjen Tuaj!