Fjala përshëndetëse e ninistrit të Mbrojtjes, z. Ermal Nufi

I nderuar z. kryeministër,

Të dashur kolegë ministra,

Të nderuar përfaqësues të Forcave të Armatosura, të pushtetit vendor, kryetarë bashkish dhe të gjithë personelit të angazhuar në situatën e zjarreve,

sot, me krenari e them që mund të jetë ndër vitet me mira të situatës së zjarreve dhe për këtë jemi të gjithë krenarë.

Por kjo nuk është për shkak të rastësisë dhe as për shkak të fatit, kjo është për shkak të një koordinimi dhe angazhimi të jashtëzakonshëm të të gjithë strukturave që merren me menaxhimin e situatës emergjente, konkretisht në këtë rast të situatës së zjarreve.

Për këtë ju jam mirënjohës të gjithëve!

Republika e Shqipërisë sot është më e përgatitur dhe më e koordinuar se kurrë për t'u përballur me emergjencat civile.

Besoj të gjithë e mbani mend se sa sfidues ishte sezoni i zjarreve vitin që shkoi: në 2025-n.

Një situatë me intensitet të lartë dhe me një shtrirje të gjerë territoriale që vuri në provë strukturat tona.

U reflektua dëshmia më e mirë se kur institucionet bashkëpunojnë dhe kur profesionalizmi e përgjegjësia vihen mbi çdo interes tjetër - ne jemi në gjendje t'iu përgjigjemi me sukses edhe sfidave më të vështira.

Mirënjohje shumë të sinqertë për secilin efektiv, dhe punonjës që kontribuon në këtë sektor.

Sezoni i kaluar e provoi më së mir se planifikimi, koordinimi, gatishmëria dhe investimet duhet të jenë procese të vazhdueshme. Ato janë të vazhdueshme dhe pikërisht mbi këtë bindje synojmë ta ndërtojmë punën tonë gjatë kësaj periudhe.

Ndihma që ne kemi pasur nga të gjitha strukturat tek Agjencia Kombëtare e Mbrojtjes Civile (AKMC), koordinimi i punës, përdorimi i Mekanizmit Evropian të Mbrojtjes Civile - janë mjete efektive dhe të shpejta në përballimin e këtyre situatave.

Një vëmendje të veçantë i kemi kushtuar edhe mbështetjes së njësive të vetëqeverisjes vendore.

Rritja e financimit për mbrojtjen civile, nga rreth 800 milionë lekë në vitin 2025; në mbi 1 miliard lekë të planifikuara për vitin 2026, është një tregues konkret i angazhimit të qeverisë shqiptare për të forcuar kapacitetet aty ku emergjencat përballohen në vijë e parë: pranë komuniteteve, pranë bashkive.

Përgjatë periudhës 1 Qershor – 24 Korrik të vitit 2026 janë evidentuar rreth 22 vatra zjarri me sipërfaqe të djegur ose të përshkuar nga zjarri dhe për menaxhimin e tyre janë mobilizuar të paktën 1,120 forca operacionale.

Këtu përfshihen patjetër efektivët e zjarrfikësve, efektivët e Policisë së Shtetit, FNSH, forca vullnetare, bashkitë, shërbimet pyjore, punonjës të Administratave Rajonale; si dhe efektivë të Forcave të Armatosura.

Të nderuar pjesëmarrës!

Fjalën time dua ta mbyll duke falënderuar në mënyrë të veçantë të gjithë punonjësit - duke filluar nga zjarrfikësit në bashki, tek koordinimi i prefektëve, me kryetarët e bashkive dhe me gjithë strukturat në rang prefekture e më pas tek AKMC dhe Forcat e Armatosura, si dhe ata efektivë, të cilët çdo ditë përballen me situatën e zjarreve të emergjencave civile, por edhe ata që bëjnë ndërhyrje të vështira nga ajri duke pasur këtë vit si një nga vitet më të mira.

Faleminderit shumë për gjithë angazhimin tuaj dhe suksese!