Fjala përshëndetëse e ministrit të Mbrojtjes, z. Ermal Nufi, në Qendrën e Arsimimit Profesional të Ushtarit

e hënë, 12 tetor 2026 17:54

I nderuar Shef i Shtabit të Përgjithshëm të Forcave të Armatosura, Gjenerallejtënant Kingji,

E nderuar ZëvendësKomandante e Forcës Tokësore, Gjeneral brigade Vehbije Kuti,

I nderuar Komandant i Bunavisë, NënKolonel Hidri,

Të nderuar komandantë, drejtues, instruktorë dhe efektivë,

Të dashur studentë, kadetë dhe ushtarë të rinj,

Është shumë emocionale të jesh në Bunavi!

Për shumë arsye!

E para ndër to është fakti që në këtë qendër për herë të parë kemi njërëz civilë që përballen me rregullin ushtarak.

Duke pasur parasysh stigmën dhe paragjykimin për uniformën që vazhdon të propagandohet në mënyrë të padrejtë në vendin tonë - këtu do të shihni për herë të parë se çfarë do të thotë të jesh ushtar.

Eshtë e lehtë të jesh në kafe të përgojosh, të flasësh dhe të japësh mend, por kur vjen puna për t’u bërë ushtar i Republikës së Shqipërisë, për t’u bërë oficer i Republikës së Shqipërisë - puna ndryshon.

Ju keni zgjedhur një rrugë tjetër!

Rruga tjetër është t’i shërbesh Atdheut, të veshësh uniformën, e cila nuk mbart vetëm disiplinën, por e mban edhe nderin dhe guximin për drejtim.

Është kollaj të bësh bisht, është kollaj të ikësh, është kollaj të fshihesh, është shumë e vështirë të qëndrosh aty ku duhet, atje ku të gjithë të tjerët flenë gjumë rehat, atje ku të gjithë të tjerët e përcjellin përgjegjësinë te dikush tjetër, dhe ata “dikush tjetër” gjithmonë jeni ju.

Është Ministria e Mbrojtjes, janë Forcat e Armatosura të Republikës së Shqipërisë!

Mbasi mburren e mburren, në fund trokasin përsëri këtu!

Në fakt Atdheu, Republika me këtë ju ka ngarkuar!

Prandaj, edhe rruga jonë është e lavdishme, e gjithësecilit prej jush, jo vetëm e atyre që i kanë gradat më të larta, por e gjithësecilit prej jush, e gjithësecilit kursant që vjen për të bërë Kursin Bazë të Ushtarit në Republikën e Shqipërisë, por edhe ju që jeni sot e filloni vitin e parë pranë Akademisë së Forcave të Armatosura (AFA).

Qendra e Arsimimit Profesional të Ushtarit këtu në Bunavi është pra, një vend ku nuk mësohen vetëm rregullat e jetës ushtarake, por ku kthehen dhe hidhen themelet e rëndësishme të përkushtimit, që do t’ju shoqërojnë përgjatë gjithë jetës suaj.

Për çdo vit të ri që fillon dhe për çdo të pranishëm këtu, jam i bindur që secili prej jush do të ketë fillimin e një kapitulli që nuk është një kapitull dosido, nuk është thjesht një ndryshim profesioni - por është kapitulli më i veçantë i jetës suaj, sepse në këtë rrugëtim që keni nisur, që tani ju keni marrë mbi vete barrën dhe përgjegjësinë për t’i shërbyer me ndershmëri dhe për të qenë të gatshëm të vendosni detyrën ndaj Atdheut mbi interesin personal.

Uniforma ushtarake është ajo që në fakt shton më shumë përgjegjësi dhe që do t’ju shoqërojë gjithë jetën!

Ajo uniformë ushtarake është privilegji i jetës suaj dhe krenaria e jetës suaj, është edhe nderi juaj!

Qendra e Arsimimit Profesional të Ushtarit përfaqëson një hallkë të jashtëzakonshme thelbësore në formimin e personelit të Forcave të Armatosura.

Nëpërmjet Stërvitjes Individuale Bazë - çdo rekrut, çdo kadet nis një rrugëtim transformimi nga jeta civile, pikërisht në atë ushtarake.

Gjatë tre muajve të trajnimit, mësohet disiplina, rregulli, qëndrueshmëria, bashkëpunimi dhe, mbi të gjitha, kuptimi i të qenit pjesë e një force që funksionon si një e tërë.

Por, këtu suksesi nuk matet vetëm me aftësinë për të përmbushur detyrën apo për të zotëruar një aftësi ushtarake. Ai matet me karakterin, me respektin për shokun, me besimin tek skuadra, me gatishmërinë për të mos e lënë kurrë pas atë që ka nevojë për ndihmë.

78 studentë të Kursit të Përgatitjes së Oficerit, të cilët do të ndjekin një trajnim dhjetë-javor; si dhe 80 studentë të ciklit “Bachelor”, që do të zhvillojnë një trajnim pesë-javor, nisën javën e kaluar një fazë të rëndësishme të formimit ushtarak.
Për secilin prej jush, këto javë trajnimi shkojnë përtej thjesht një programi stërvitor.

Janë javë, janë mundësi për të zbuluar aftësitë tuaja, për të njohur kufijtë tuaj dhe për të mësuar se si kapërcehen ata përmes vullnetit, disiplinës dhe punës në grup.

Po hidhni hapat e parë drejt një profesioni që nuk ju kërkon vetëm të dini të jepni dhe të zbatoni urdhra, por edhe të kuptoni përgjegjësinë që mbart çdo vendim!

Sidomos për ata që synojnë të bëhen oficerë, udhëheqja nuk do të thotë thjesht të drejtosh të tjerët.

Do të thotë të japësh shembullin e duhur, të fitosh besimin e vartësve dhe të marrësh përgjegjësi në momentet më të vështira, prandaj shfrytëzojeni çdo ditë të këtij formimi!

Mësoni nga instruktorët tuaj, mbështesni njëri-tjetrin dhe mos kini frikë nga vështirësitë. Ato janë pjesë e procesit që ju përgatit për sfidat që ju presin!

Më lejoni të ndaj edhe një mesazh për instruktorët e kësaj Qendre.

Përgjegjësia që keni është po aq e rëndësishme sa edhe misioni i Qendrës!

Ju nuk përcillni vetëm njohuri dhe aftësi, ju formoni qëndrime, ndërtoni besim dhe përcillni vlera mbi të cilat mbështetet shërbimi ushtarak.

Shembulli juaj, profesionalizmi dhe kërkesa për standarde të larta do të ndikojnë drejtpërdrejt në cilësinë e ushtarakëve që do të dalin nga kjo qendër.

Arsimi dhe trajnimi ushtarak duhet të mbeten një proces i vazhdueshëm, por që nis me përgatitjen bazë dhe zhvillohet gjatë gjithë karrierës.

Në këtë kuadër, edhe Stërvitja Individuale e Avancuar është një dëshmi e kësaj filozofie: pasi kanë fituar njohuritë themelore, ushtarakët vijojnë të thellojnë aftësitë dhe të përgatiten për përgjegjësi akoma më të mëdha.

Dhe ky është drejtimi që ne duhet të ndjekim: një Forcë e Armatosur që vazhdimisht përshtatet me ndryshimet dhe investon te njerëzit e saj po aq sa investon në modernizimin e kapaciteteve.

Në një mjedis sigurie që ndryshon me shpejtësi, Shqipëria ka nevojë për ushtarakë profesionistë, të aftë dhe të përgatitur për të vepruar sipas standardeve të NATO-s, për të përballuar sfidat e reja dhe për të kontribuar me përgjegjësi në sigurinë tonë të përbashkët euroatlantike.

Të dashur studentë, kadetë dhe ushtarë të rinj!

Disa prej jush do ta kujtojnë këtë periudhë si fillimin e një karriere të gjatë ushtarake.

Të tjerë do ta shohin si hapin e parë drejt përgjegjësive drejtuese.

Por, të gjithë do të mbani me vete mësimet e përfituara këtu: se disiplina është forcë, bashkëpunimi është domosdoshmëri dhe se besimi fitohet çdo ditë përmes veprave.

Ju uroj ta përfundoni me sukses këtë trajnim, të ecni përpara me krenari, përulësi dhe vendosmëri, duke pasur parasysh gjithmonë se Atdheu nuk ka nevojë vetëm për njerëz që zgjedhin të veshin uniformën, por ka nevojë për njerëz që kuptojnë se çfarë ajo përfaqëson dhe që janë të gatshëm ta nderojnë çdo ditë me veprimet e tyre!

Ju falënderoj për përkushtimin, ju uroj sukses në këtë rrugëtim dhe u shpreh mirënjohjen time të gjithë atyre që punojnë çdo ditë për formimin e brezave të rinj të Forcave të Armatosura!

Me krahë të lehta dhe mbarësi!