Për luftën kundër korrupsionit në MM dhe FA

Duke e konsideruar luftën kundër korrupsionit si një nga sfidat kryesore, qeveria shqiptare me vendimin e Këshillit të Ministrave nr. 247, datë 20.03.2015 “Për miratimin e strategjisë ndërsektoriale kundër korrupsionit për periudhën 2015 - 2020”, ka miratuar Strategjinë dhe Planin e Veprimit Kundër Korrupsionit për periudhën 2015 - 2018. Këto dokumente shumë të rëndësishme u hartuan në zbatim të prioriteteve të qeverisë dhe përmbajnë objektivat kryesore të luftës kundër korrupsionit.

Me qëllim zbatimin e objektivave të kësaj strategjie në vitin 2017 u hartua dhe miratua me vendim të Këshillit të Ministrave, "Plani i Veprimit 2018 - 2020", i cili vijon të zbatohet dhe për zbatimin e të cilit raportohet çdo tre muaj.  Gjithashtu pranë koordinatorit kombëtar të luftës kundër korrupsionit, Ministrit të Drejtësisë funksionon Komiteti Ndërsektorial si dhe Task-Forca Kundër Korrupsionit.

Ministria e Mbrojtjes përfaqësohet në Komitetin Ndërsektorial nga zëvendësministri z. Petro Koçi. Në rang ministrie çështjet e luftës kundër korrupsionit ndiqen nga Drejtoria e Inspektimit të Përgjithshëm (DIP), ku funksionon edhe pika e kontaktit e cila përgjigjet dhe raporton tek koordinatori kombëtar edhe për zbatimin e Planit të Veprimit 2018 - 2020.  Po ashtu në çdo institucion duke filluar nga Shtabi i Përgjithshëm i FA dhe ato të vartësisë është ngritur e funksionon rrjeti i koordinatorëve kundër korrupsionit, të cilët raportojnë çdo tre muaj për zbatimin e planeve të veprimit dhe masat kundër korrupsionit.

Një shtysë e madhe në drejtim të informimit, transparencës dhe luftës kundër korrupsionit ishin miratimi i ligjeve të posaçme dhe akteve nënligjore për të drejtën e informimit dhe sinjalizimin, çështje të cilat në Ministrinë e Mbrojtjes ndiqen nga Drejtoria e Inspektimit të Përgjithshëm. Drejtori i DIP me urdhër të ministrit të Mbrojtjes është caktuar koordinator për të drejtën e informimit dhe njëkohësisht drejtues i Njësisë Përgjegjëse për sinjalizimin dhe mbrojtjen e sinjalizuesve. Me personat e ngarkuar nga komandat dhe strukturat vartëse në këto detyra, herë pas here organizohen trajnime dhe mbledhje, ku ata informohen dhe raportojnë për arritjet dhe problematikat e dala gjatë punës.

Miratimi i këtyre akteve ligjore e nënligjore dhe masave të tjera të Planit të Veprimit të Ministrisë së Mbrojtjes, jo vetëm që ka minimizuar hapësirat për korrupsion në Forcat e Armatosura, por ka dhënë efekte mjaft pozitive për realizimin e misionit dhe detyrave të çdo strukture të Forcave të Armatosura, në drejtim të rritjes së moralit e organizimit të efektivave si dhe përmirësimin e figurës dhe dinjitetit të ushtarakut. Ministria e Mbrojtjes do të vijojë të marrë masa të tilla, të cilat do të ndikojnë në përmirësimin e kushteve të punës dhe jetesës së ushtarakeve, për ta bërë këtë profesion sa më atraktiv dhe sa më të nderuar në komunitet.  

Zbatimi i masave të Strategjisë Kombëtare të Luftës Kundër Korrupsionit dhe masave të parashikuara në Planin e Veprimit, kanë sjellë një sensibilizim më të madh të shoqërisë si dhe një ndjenjë përgjegjësie shumë më të madhe të administratës shtetërore për të mos u futur në veprime korruptive apo të shpërdorimit të detyrës shtetërore.