Industria Ushtarake

KM Poliçan (municione)

Kombinati Mekanik Poliçan është një ndërmarrje shtetërore, e themeluar në vitin 1962, me qëllim përmbushjen e kërkesave të Forcave të Armatosura shqiptare për armatim. Në periudhën 1962-1966 u krijua linja e prodhimit për municionin 7.62x39mm (“Kallashnikov”), municionin mortajë 82 mm, granata dore ofensive dhe difensive, si edhe mina kundër-njeri. Në periudhën 1970-1972 në godinën ekzistuese u instalua linja e prodhimit të minave kundër-tank dhe në një godinë të re u vendos linja e fishekzjarrëve 180 mm. Në periudhën 1977-1985 u krye një rikonstruksion i thellë me makineri dhe pajisje të ardhura nga Zvicra dhe Austria, për të mundësuar prodhimin e municionit kalibër 12.7x99mm dhe 14.5x51mm si edhe municion mortaje me kalibër 60, 107 dhe 120mm. Aktualisht  ndërmarrja prodhon municion pistolete të tipit “Makarov” dhe “Parabellum” me kalibër 19mm. Kompania ka mundësi të mëdha për të prodhuar për popullsinë civile, sidomos prodhime fonderie hekuri dhe çeliku. Kombinati i Poliçanit ka sistem cilësie GOST.

Për më shumë vizitoni adresën zyrtare të KM Poliçan. (www.kmp.gov.al)

UM Gramsh (armatimi)

Uzina Mekanike Gramsh është një ndërmarrje shtetërore. Projekti i punës ka filluar në vitin 1962 ndërsa prodhimi me licencë kineze filloi në vitin 1962 me pushkë të tipit “Simonov” me kalibër 7.62 mm.  Në vitin  1974 u instalua prodhimi i automatikut AK-47.

UM GRAMSH siguron shërbime prodhuese për industrinë  e mbrojtjes me makineritë e saj të precizionit të lartë, riparime, trajtime në të nxehtë si edhe emalimin e sipërfaqeve.  Sistemi i cilësisë së ndërmarrjes është i certifikuar me GOST.

ULP Mjekës (eksplozivë)

Uzina e Lëndëve Plasëse Mjekës është një ndërmarrje shtetërore që ka prodhuar eksplozivë dhe propelante qysh prej vitit 1962. Në vitin 1982 filloi prodhimin e eksploziveve të fuqishëm me licencën e “BOFORS” në mjedise të reja dhe të përshtatshme.  Janë gjithsej 6 uzina të vendosura në afërsi të qytetit të Elbasanit, që ndodhet rreth 50 km nga Tirana. Aktualisht ndërmarrja prodhon vetëm dinamit dhe municione për të përmbushur nevojat e minierave shqiptare si edhe po eksporton në mënyrë të suksesshme në Kosovë.

Ndërmarrja është e interesuar të bashkëpunojë me kompani të huaja në bashkëpunim prodhimi dhe marketimi të produkteve të tyre, sidomos në dinamit, municion dhe propelante.    

Prodhime:

    -  dinamit
    -  municione
    -  barut i zi
    -  fitila sigurie
    -  TNT
    -  DNT
    -  RDX
    -  Propelante (NG/NC) me bazë teke dhe çifte
    -  nitroceluloze

Kohët e fundit ndërmarrja është duke kryer me sukses një projekt për demilitarizimin e rreth 1.3 milion mina kundër-njeri dhe shpreson të fillojë një projekt të ri për shkatërrimin e municionit të lehtë.