Trajtimet e veçanta financiare në momentin e daljes në pension

1. Trajtimi i veçantë financiar i efektivave oficerë dhe nënoficerë lundrues, të nëndetëseve dhe palombarëve të forcave detare në pension.

Në mbështetje të ligjit nr. 9361, datë 24.03.2005, “Për një trajtim të veçantë financiar të efektivave oficerë dhe nënoficerë lundrues, të nëndetëseve dhe palombarëve të forcave detare në pension” trajtohen financiarisht efektivat, oficerë dhe nënoficerë lundrues, të nëndetëseve e të polumbarëve, që kanë shërbyer në strukturat e Forcave Detare të Republikës së Shqipërisë, në shtesë të pensionit të pleqërisë, të cilin e përfitojnë nga sigurimi shoqëror i detyrueshëm, në çastin e lindjes të së drejtës së përfitimit të këtij trajtimi.

Baza e llogaritjes

Paga referuese është bazë për llogaritjen e këtij trajtimi të veçantë financiar.
Me pagë referuese, për efekt të këtij ligji, kuptohet paga bazë për funksionin plus shpërblimin për gradë sipas viteve të shërbimit, të njësuar me pagën e ushtarakut të së njëjtës gradë, në çastin e lindjes të së drejtës për trajtim të veçantë financiar.

Financimi dhe llogaritja e përfitimit

Efektet financiare, që rrjedhin nga ky ligj, përballohen nga Buxheti i Shtetit.
Pagesa dhe caktimi i përfitimeve, që rrjedhin nga ky ligj, bëhen nga Instituti i Sigurimeve Shoqërore.

Mënyra e llogaritjes së përfitimeve përcaktohet me vendim të Këshillit të Ministrave.

Kushtet e përfitimit

Efektivat lundrues, oficerë dhe nënoficerë, të cilët kanë shërbyer në nëndetëse dhe të palombarëve, oficerë dhe nënoficerë, të Forcave Detare, të cilët kanë plotësuar ose plotësojnë kushtet për pension pleqërie, përfitojnë, përveç pensionit të pleqërisë, një trajtim financiar në masën:

a) 50 për qind të pagës referuese, kur kanë shërbyer jo më pak se 12,5 vite kalendarike;
b) 30 për qind të pagës referuese, kur kanë shërbyer jo më pak se 10 vite kalendarike;
c) 20 për qind të pagës referuese, kur kanë shërbyer jo më pak se 7 vite kalendarike.

Shuma e pensionit

Shuma e pensionit të plotë të pleqërisë plus masën e trajtimit të veçantë financiar, sipas këtij ligji, nuk mund të jetë më e madhe se 50 për qind e pagës referuese të oficerit dhe nënoficerit të nëndetëses dhe të palombarit në çastin që i ka lindur e drejta e përfitimit.
Masa e trajtimit të veçantë financiar indeksohet sa herë që indeksohen pensionet e pleqërisë.

2. Trajtimi i veçantë financiar i pilotëve fluturues, në pension:

Në mbështetje të Ligjit nr. 9128, datë 29.07.2003, “Për një trajtim të veçantë financiar të pilotëve fluturues, në pension” si dhe akteve ligjore në zbatim të tyre ushtarakët në pension me profesionin pilot dhe nënujës përfitojnë trajtim të veçantë financiar në bazë të viteve të shërbimit në këto funksione organike.

Subjektete përfitues:

a) pilotët/teknikët e Forcave të Armatosura, të cilët kanë fluturuar me helikopterë;
b) pilotët/teknikët e njësisë së transportit mjekësor me helikopter, të cilët kanë fluturuar me helikopterë;
c) pilotët/teknikët e repartit të helikopterëve të Policisë së Shtetit, të cilët kanë fluturuar me helikopterë;
ç) pilotët/teknikët e Gardës së Republikës, të cilët kanë fluturuar me helikopterë.

Baza e llogaritjes

Paga referuese është bazë për llogaritjen e këtij trajtimi financiar të veçantë.

Me pagë referuese, për efekt të këtij ligji, kuptohet:

a) për pilotët/teknikët e Forcave e Armatosura, paga bazë për funksionin, plus shpërblimin për gradën, të njësuar me pagën referuese të funksionit organik të ushtarakut aktiv, në të njëjtën detyrë me përfituesin, në çastin e lindjes së të drejtës për trajtim financiar të veçantë;

b) për pilotët/teknikët e njësisë së transportit mjekësor me helikopter, paga e grupit, plus pozicionin dhe shtesat për fluturime, të njësuara me pagën referuese të funksionit organik të pilotit/teknikut të kësaj njësie, në të njëjtën detyrë me përfituesin, në çastin e lindjes së të drejtës për trajtim të veçantë financiar;
c) për pilotët/teknikët e repartit të helikopterëve të Policisë së Shtetit, paga bazë për gradë apo funksion, plus shtesën për natyrë të veçantë pune e shërbimi, të njësuar me pagën referuese të funksionit organik të pilotit/teknikut, në të njëjtën detyrë me përfituesin, në çastin e lindjes së të drejtës për trajtim të veçantë financiar;

d) për pilotët/teknikët e Gardës së Republikës, paga bazë për gradë, plus shtesën për kushte të veçanta pune e shërbimi, të njësuar me pagën referuese të funksionit organik të pilotit/teknikut, në të njëjtën detyrë me përfituesin, në çastin e lindjes së të drejtës për trajtim të veçantë financiar.

Financimi dhe llogaritja e përfitimit

Kushtet e përfitimit (ndryshuar me nenin 4 të Ligjit nr. 10 353, datë 18.11.2010)
Pilotët, të cilët kanë fluturuar me avionë reaktivë, avionë me helikë dhe helikopterë dhe që kanë plotësuar ose plotësojnë kushtet për pension pleqërie, përfitojnë, përveç pensionit të pleqërisë, një trajtim të veçantë financiar, në shtesë të pensionit, në masën:

1. 50%të pagës referuese që ka pasur përfituesi në çastin e daljes në rezervë, lirim ose pension pleqërie:
   a) kur piloti ka fluturuar me avionë reaktivë jo më pak se 12,5 (dymbëdhjetë vjet e gjashtë muaj) vite kalendarike;
   b) kur piloti ka fluturuar me avionë me helikë dhe me helikopterë jo më pak se 16,5 (gjashtëmbëdhjetë vjet e gjashtë muaj) vite kalendarike.

2. 35% të pagës referuese që ka pasur përfituesi në çastin e daljes në rezervë, lirim ose pension pleqërie:
   a) kur piloti ka fluturuar me avionë reaktivë jo më pak se 8,5 (tetë vjet e gjashtë muaj) vite kalendarike;
   b) kur piloti ka fluturuar me avionë me helikë dhe me helikopterë jo më pak se 12,5 (dymbëdhjetë vjet e gjashtë muaj) vite kalendarike.

3. 25% të pagës referuese që ka pasur përfituesi në çastin e daljes në rezervë, lirim ose pension pleqërie, për funksionet avion drejtues fluturues, qitës-radist, radist, teknik, fluturues bordi, me jo më pak se 15 vite vjetërsi në shërbim, pavarësisht nga koha e daljes në pension. Shuma e pensionit te plote te pleqërisë plus masën e trajtimit te veçante financiar, sipas këtij ligji, nuk mund te jete me e madhe se 50% e pagës referuese te pilotit fluturues, kur ka dale ne rezerve, lirim ose pension pleqërie.

Masa e trajtimit te veçantë të pilotëve fluturues indeksohet sa herë që indeksohen pensionet e pleqërisë.