Trajtimi ekonomik e financiar i familjeve të punonjësve të rënë në krye të detyrës me rastin e ditës përkujtimore

Në zbatim të Ligjit nr. 10289/2010 “Për mënyrën e trajtimit ekonomik e financiar dhe për dhënie ndihme të menjëhershme familjeve të punonjësve të Policisë së Shtetit dhe të Shpëtimit, të Forcave të Armatosura”, Udhëzimit të KM nr. 6/2010 “Për zbatimin e Ligjit nr. 10289/2010” ndryshuar, si dhe urdhrit të MM nr. 448/2018 “Për miratimin e ndihmës financiare me rastin e ditës përkujtimore të rënies së punonjësit të Forcave të Armatosura, në krye të detyrës apo për shkak të saj”, i ndryshuar, familjaret e punonjësve të rënë në krye të detyrës ose për shkak të saj përfitojnë si më poshtë:

1. Fëmijët e punonjësve që kanë humbur jetën në detyrë apo për shkak të saj, përfitojnë pension familjar të barabartë me pagën referuese të punonjësit në çastin e humbjes së jetës, deri kur secili prej fëmijëve të ketë mbushur moshën 18 vjeç dhe, pas kësaj periudhe, bashkëshortja/bashkëshorti dhe anëtarët e familjes në ngarkim përfitojnë pension familjar e suplementar, sipas dispozitave ligjore në fuqi. Përfitimet, që jepen vendosen në vlerën 100% të pagës, sa herë që paga, sipas së cilës është llogaritur ky përfitim, ndryshon.
2. Bashkëshortja/bashkëshorti, fëmijët nën 18 vjeç ose deri në 25 vjeç, kur kryejnë studimet e larta, prindërit bashkëjetues dhe personat në kujdestari, në çastin e humbjes së jetës së punonjësit të përmendur në nenin 1 të këtij ligji, përfitojnë ndihmë të menjëhershme financiare jo më pak se 200 000 lekë.
3. Familjarëve në ngarkim të punonjësve të rënë u jepet ndihmë e menjëhershme për përballimin e shpenzimeve të varrimit.
4. Shteti merr përsipër trajtimin me bursë të plotë për të gjithë fëmijët e punonjësve të përmendur në nenin 1 të këtij ligji, të cilët kanë fituar të drejtën e ndjekjes së studimeve në institucionet publike shtetërore të arsimit të lartë brenda vendit.
5. Familjet e punonjësve të përmendur në nenin 1 të këtij ligji, që kanë humbur jetën në krye apo për shkak të detyrës, përfitojnë trajtim me përparësi për strehim, sipas kritereve dhe procedurave të parashikuara në legjislacionin në fuqi.
6. Familjarëve dhe prindërve, me të cilët punonjësi bashkëjetonte para humbjes së jetës në krye të detyrës apo për shkak të saj, në ditën përkujtimore të punonjësit, u jepet ndihmë financiare në masën 50.000 lekë.