Mbështetja financiare për kujdesin shëndetësor

1. Trajtimi me ndihmë të menjëhershme financiare i ushtarakëve aktiv të FARSH.

Në zbatim të nenit 30, të ligjit nr. 9210, datë 23.3.2004 “Për Statusin e Ushtarakut të Forcave të Armatosura të Republikës së Shqipërisë”, të ndryshuar; udhëzimit të MM nr. 6/2022, datë 12.12.2022, “Për procedurat e dhënies së ndihmës së menjëhershme financiare në zbatim të nenit 30, të ligjit nr. 9210, datë 23.03.2004...” ushtaraku aktiv i Forcave të Armatosura përfiton ndihmë të menjëhershme financiare:

- në rast sëmundje/vdekje apo dëmtime të mëdha të pronës, të ushtarakut, si rezultat i një fatkeqësie natyrore, në masën deri në gjashtë paga mujore.
- në rast sëmundje/vdekje të një familjari në ngarkim të tij, në masën deri në tre paga mujore
- në rast kur studenti i shkollave të larta ushtarake, kursanti, gjatë kohës së studimeve shërbimit ose stërvitjes, vdes familjes i jepet ndihmë deri në katër paga mujore.

Masa e dhënies së ndihmës jepet e përshkallëzuar, në varësi të llojit/klasifikimit të sëmundjes apo dëmit të shkaktuar nga fatkeqësitë natyrore. Ndihma jepet me urdhër të Ministrit të Mbrojtjes, me propozim të Shefit të Shtabit të Përgjithshëm të FA.

2. Trajtimi me ndihmë të menjëhershme financiare i punonjësve civil të AISM.

Referuar ligjit nr. 65/2014 “Për AISM”, i ndryshuar, VKM nr. 622/2017 “Për përcaktimin e kritereve dhe të masës së përfitimit të ndihmës financiare...”, si dhe Udhëzimit të MM nr. 5/2018 “Për përcaktimin e procedurave dhe dokumentacionit të nevojshëm për dhënien e ndihmës financiare në zbatim të VKM nr. 622/2017 të KM”; punonjësit civil të AISM trajtohen me ndihmë të menjëhershme financiare:

- në rastet e vdekjes së punonjësit, në masën gjashtë paga mujore,
- në rastet e sëmundjes së rëndë së punonjësit, në masën katër paga mujore,
- në rast kur një nga familjarët në ngarkim të tij, vdes ose sëmuret rëndë, në masën tre paga mujore,
- në rast të dëmtimeve të rënda të pronës, si rezultat i një fatkeqësie natyrore, katër paga mujore,
- në rastet e vdekjes së punonjësit në detyrë, organizimi i ceremonisë dhe përballimi i shpenzimeve të varrimit miratohet me urdhër të Ministrit të Mbrojtjes me propozim të AISM.

3. Trajtimi me ndihmë të menjëhershme financiare i punonjësve civil të MM dhe FARSH.

Në mbështetje të Vendimi nr. 929, datë 17.11.2010, të Këshillit të Ministrave, “Për krijimin dhe përdorimin e fondit të veçantë”, të ndryshuar; punonjësit civil trajtohen me ndihmë financiare në raste të sëmundjeve të rënda kur kërkohet ndërhyrje kirurgjikale apo një trajtim mjekësor i gjatë si dhe vdekjes së punonjësit apo të një anëtari të familjes.