Afganistan, operacioni RSM drejtuar nga NATO

Menjëherë pas mbylljes së misionit ISAF në Afganistan në fund të vitit 2014, më 1 janar 2015 NATO filloi një mision të ri në Afganistan të emërtuar Resolute Support Mission (RSM).

Sasia e personelit të dislokuar në terren për përmbushjen e këtij misioni arrin në 8.000 vetë (nga vendet anëtare si dhe nga 14 vende partnere të NATO). Shtabi i RSM është vendosur në Kabul dhe në territorin e Afganistanit ka shpërndarë 6 komanda kryesore Train Advise Assist Command (TAAC):
TAAC - Capital (Kabul);
TAAC - North (Mazar-e-Sharif);
TAAC - West (Herat);
TAAC - East (Laghman);
TAAC - South (Kandahar);
TAAC - Air (e shpërndarë në gjithë Afghanistanin)

Baza ligjore e këtij misioni është Marrëveshja e Statusit të Forcave (Status of Forces Agreement = SOFA), e cila është nënshkruar në Kabul më 30 shtator 2014 dhe është ratifikuar nga parlamenti afgan me 27 nëntor 2014. Kjo marrëveshje përcakton kushtet dhe afatet mbi bazën e të cilave janë dislokuar forcat e NATO si dhe gamën e aktiviteteve dhe veprimeve ushtarake të lejuara brenda territorit të Afganistanit. Për këtë mision, Këshilli i Sigurimit të Kombeve të Bashkuara ka nxjerrë Rezolutën 2189, datë 12 dhjetor 2014.

RSM ka për qëllim të ofrojë stërvitje, këshillim dhe asistencë për Afganistanin në tetë fusha kryesore: buxhetimi shumëvjeçar; transparenca; përgjegjësia dhe kontrolli; kontrolli civil mbi institucionet afgane të sigurisë; gjenerimi i forcës; mbajtja e forcës; planizimi strategjik dhe politik; gjetja e burimeve dhe ekzekutimi; inteligjenca; komunikimi strategjik.



FARSH aktualisht janë angazhuar me një personel prej 83 ushtarakësh:

1. Në Kabul (TAAC - Capital) me 1 kontingjent (Force Protection), 30 ushtarakë;
2. Në Herat (TAAC - West) me 1 kontingjent (Force Protection), 40 ushtarakë;
3. Përfaqësues në shtabe të ndryshme (Kabul, Herat dhe Mazar-e-Sharif) 13 ushtarakë.

Për vitin 2018, përveç kontributeve aktuale, ministri i Mbrojtjes ka miratuar shtimin e kontributit të FARSH me 52 ushtarakë në operacionin “RSM” në Afganistan.