Pak ditë pasi u dorëzuan rreth 208 pako për familjet në nevojë të Shkodrës, ministrja e Mbrojtjes Olta Xhaçka dhe efektivë të Forcave të Armatosura janë rikthyer sërish në këtë qytet, ku në bashkëpunim me “Fundjavë ndryshe” iu dorëzuan pushtetit vendor 45 ton ushqime për shtresat më të dëmtuara nga situata e COVID - 19.
Në dorëzimin e këtyre ndihmave, ministrja e Mbrojtjes, bashkë me prefektin Çesk Millja e kryetaren e Bashkisë Shkodër Voltana Ademi dhe përfaqësues të Klerit, theksoi se familjet në nevojë janë identifikuar dhe ndihmat do të shpërndahen menjëherë.
“Dua të falënderoj së pari Arbrin, “Fundjavë ndryshe” për këtë ndihmë të jashtëzakonshme që ka ofruar dhe për punën kolosale që ka bërë gjatë gjithë këtyre javëve. Sot kthehemi pas pak ditësh në Qarkun e Shkodrës. Ishim para pak ditësh për ndihmë tek 208 familje të skemës së ndihmës ekonomike, po të kategorisë me shumë pjesëtarë të familjes dhe me shumë fëmijë nën moshën 18 vjeç, rikthehemi kësaj radhe nën koordinim me “Fundjavën ndryshe” të cilët në fakt na kanë vënë në dispozicion të operacionit humanitar, gjithë energjinë e tyre, gjithë solidaritetin e jashtëzakonshëm”, - tha Xhaçka.
Ministrja Xhaçka nënvizoi se përmes operacionit humanitar të iniciuar nga qeveria e të koordinuar nga Ministria e Mbrojtjes, bashkë me të gjithë aktorët e tjerë është bërë e mundur që t'u vihet në ndihmë 186 mijë qytetarëve dhe familjeve në nevojë.
Kryetarja e Bashkisë Shkodër Voltana Ademi siguroi se shpërndarja e ndihmave do të bëhet sa më shpejt dhe duke respektuar të gjithë kriteret për familjet më në nevojë.
Drejtuesi I Fondacionit “Fundjavë ndryshe”, Arbër Hajdari, vlerësoi dhe angazhimin dhe koordinimin e Ministrisë së Mbrojtjes për shpërndarjen e ndihmave në të gjithë qarkun e Shkodrës. Nga ana e tij edhe prefekti i Shkodrës Çesk Millja shprehu bindjen e plotë se duke punuar të gjithë së bashku edhe kjo situatë do të kapërcehet.
VIDEO
© Ministria e Mbrojtjes 2024 - Të gjitha të drejtat e rezervuara.