Familjet Lleshi dhe Murati në Bathore janë dy familjet e para që hyjnë në shtëpitë e reja pasi të vjetrat u shkatërruan nga tërmeti i 21 Shtatorit.
Banesat e këtyre dy familjeve janë mes 170 shtëpive në 6 bashki, ndërtimi i të cilave po bëhet nga Buxheti i Shtetit dhe ai i Emergjencave Civile dhe pritet të përfundojnë brenda muajit korrik.
Ministrja e Mbrojtjes Olta Xhaçka ishte vetë në Bathore për t’i dorëzuar çelësat e shtëpisë së re dy kryefamiljarëve.
“T’i gëzoni shtëpitë! Bashkë me ju janë 168 familje të tjera në Durrës, Krujë, Kamëz, Shijak, Kavajë e Rrogozhinë, që në ditët në vijim do të hyjnë në banesat e tyre të reja. Megjithë vështirësitë që COVID-19 shkaktoi në të gjithë sektorët ekonomikë e socialë edhe në Shqipëri, të gjithë bashkë ne ia dolëm të mbyllim një proces me shumë rëndësi për jetët dhe familjet tuaja.” - u shpreh ministrja Xhaçka.
Të gjitha shtëpitë po rindërtohen me standarde bashkëkohore, duke respektuar parametrat e sigurisë, lidhjet me rrjetin elektrik, të ujësjellësit apo kanalizimet, të cilat një pjesë e tyre nuk i kanë pasur përpara tërmetit.
Për rindërtimin e 170 banesave të shkatërruara nga tërmeti i 21 Shtatorit në 6 bashki janë akorduar 470 milionë lek nga Buxheti i Shtetit, ndërsa 90 të tjera janë akorduar nga buxheti i dedikuar për emergjencat civile nga Ministria e Mbrojtjes.
© Ministria e Mbrojtjes 2024 - Të gjitha të drejtat e rezervuara.