675 maturantë, të cilët kanë përfunduar arsimin e mesëm këtë vit, kanë zgjedhur shkencat ushtarake pranë Akademisë së Forcave të Armatosura, si një prej degëve ku duan të studiojnë, që në tetor hap për herë të parë programin Bachelor.
Pak ditë pas përfundimit të aplikimeve, grupi i parë i të rinjve, nisi konkurimin me kontrollin mjekësor dhe testimin fizik përmes ekipit profesionist të mjekëve dhe pedagogëve e specialistëve të edukimit fizik në AFA.
Ministrja e Mbrojtjes Olta Xhaçka ndërsa publikon edhe fotot nga procesi i testimeve fizike e mjekësore, thekson se në përfundim të konkurimit do zgjidhen 60 studentët e parë të AFA, që do të nisin vitin akademik në muajin tetor.
"675 maturantë kanë aplikuar deri tani për të ndjekur studimet Bachelor pranë AFA dhe jemi super optimistë që në përfundim të raundit të tretë do të kemi 60 studentët e parë të shkollës sonë ushtarake, shtyllës kryesore të formimit të Forcave tona të Armatosura.", - shprehet ministrja e Mbrojtjes.
Akademia e Forcave të Armatosura, sipas ministres Xhaçka, është një mundësi e jashtëzakonshme për të gjithë të rinjtë që mbarojnë shkollën e mesme. Veç formimit akademik, për çdo student fitues ka një pagesë mujore ndihmëse për të gjithë periudhën e studimit, akomodim dhe ushqim falas, zero tarifë studimi në vit si dhe punësim i sigurt pas përfundimit të studimeve për tu bërë pjesë e elitës së Forcave të Armatosura.
© Ministria e Mbrojtjes 2024 - Të gjitha të drejtat e rezervuara.