Situata e rënduar në pikën kufitare të Kakavijës është lehtësuar gjatë mbremjes së sotme pas bisedimeve dhe rënies dakord mes palës shqiptare dhe asaj greke për të punuar me më shumë sportele nga ana e shtetit fqinj.
Ministrja e Mbrojtjes Olta Xhaçka dhe drejtori i Përgjithshëm i Emergjencave Civile Haki Çako kanë qenë në terren dhe kanë ndjekur nga afër situatën.
Në lidhje me gjendjen e rënduar, ministrja e Mbrotjes bëri me dije që situata nuk mund të zgjidhej menjëherë për shkak të masave që shteti fqinj ka vendosur në pikën e tij kufitare dhe kjo nuk mund të ndryshohet, ama është arritur dakordësia që pala greke të përshpejtojnë punën për të zgjidhur sa më shpejt situatën shqetësuese.
Ndihma për qytetarët që presin të kalojnë kufirin nuk ka munguar, jo vetëm me ujë dhe ushqim, por edhe me asistencë mjekësore. Ministrja e Mbrojtjes ju ka bërë thirrje qytetarëve të tregohen të duruar dhe të kuptojnë që situata e COVID-19 vështirëson shumë procese dhe për këtë duhet të tregojmë durim dhe pse situata është e vështirë.
“Është detyra jonë që t’ju gjendemi pranë me më të mirën e mundshme, në këtë situatë që jemi sot. I kemi ndihmuar me gjithçka që kemi mundur. Mos harroni se Koronavirusi ka paralizuar gjithë botën sot. Kjo pandemi ka paralizuar çdo aktivitet. Nuk ka tendencë nga pala greke për të vështirësuar gjërat, por janë rregulla që janë vendosur.” , - është shprehur Xhaçka.
Ndërkaq, drejtori i Përgjithshëm i Emergjencave Civile u shpreh se janë vënë ne dispozicion të gjitha strukturat shtetërore për zgjidhjen e situatës së krijuar.
Për të ardhur në ndihmë të qytetarëve dhe për t’ i furnizuar me ushqime dhe maska, në pikën kufitare të Kakavijës janë mbi 200 efektivë të FA.
© Ministria e Mbrojtjes 2024 - Të gjitha të drejtat e rezervuara.