Në datat 23-24 shtator 2020, në kuadër të Iniciatives të SEDM, i cili kryesohet nga Shqipëria, në Ministrinë e Mbrojtjes, u zhvillua nëpërmjet video-konferencës, Takimi i 43-të i Komitetit Koordinues të Ministerialit të Mbrojtjes së Europës Juglindore (SEDM-CC) dhe Takimi i 44-të i Komitetit Drejtues Politiko - Ushtarak/Forcës Paqeruajtëse Shumëkombëshe të Europës Juglindore (PMSC/MPFSEE).
Takimet u realizuan nëpërmjet video-konferencës me mbështetjen e portalit të SEDM si rezultat i situatës të pandemisë të COVID-19.
Përfaqësues nga 13 vende anëtare të SEDM, komandanti i Brigadës së Europës Juglindore (SEEBRIG) si dhe vëzhgues nga NATO IS, UNDP SEESAC, RCC dhe RACVIAC, morën pjesë në këto takime, që u drejtuan nga zëvendësministri i Mbrojtjes Petro Koçi, njëkohësisht kryetar i Sekretariatit të SEDM-CC/PMSC.
Zëvendësministri i Mbrojtjes Petro Koçi theksoi në fjalën e tij se Iniciativa e SEDM ka treguar në gjithë këto vite se është një proces i shkëlqyer për forcimin e bashkëpunimit rajonal dhe dialogut të përbashkët në fushën e sfidave ndaj sigurisë. Detyra jonë është që bashkërisht nëpërmjet këtij procesi të kontribuojmë në të mirë të paqes dhe stabilitetit rajonal.
Në Takim e SEDM-CC u diskutuan projektet në kuadër të SEDM-it dhe pjesëmarrësit përshëndetën zhvillimin dhe përparimin e tyre, respektivisht ndërlidhjen e spitaleve ushtarake (Interconnection of Military Hospitals Project), promovimin e lidereve gra në fushën e mbrojtjes dhe sigurisë (Female Leaders in Security and Defense -FLSD) në mbështetje të implementimit të rezolutës të UNSCR 1325, promovimin e institucioneve transparente në vënien në zbatim të principeve të transparences dhe integritetit (Building Integrity) si dhe në zhvillimin e metejshmëm të Portalit të SEDM (SEDM Portal).
Në Takimin e PMSC, u diskutuan menaxhimi dhe dhënia e direktivave për të gjitha çështjet që lidhen me Forcën Paqeruajtëse Shumëkombëshe të Europës Juglindore si dhe zhvillimi i kapaciteteve dhe angazhimeve të ardhshme të Brigadës së SEEBRIG, për të cilën u aprovua Plani Vjetor për vitin 2021dhe Buxheti i Brigadës për vitin 2021.
Në klimën e bashkëpunimit dhe mirëkuptimit, vendet shprehën vullnet të përbashkët dhe vendosmëri për zhvillimin dhe forcimin e bashkëpunimit rajonal.
© Ministria e Mbrojtjes 2024 - Të gjitha të drejtat e rezervuara.