Newsroom Përfundoi detyrën në Shqipëri, ministri i Mbrojtjes Peleshi vlerëson atasheun ushtarak amerikan
Ministri i Mbrojtjes Niko Peleshi, priti në një takim kortezie atasheun ushtarak të SHBA-së në Tiranë, kapiten i rangut I James Hilton, i cili këto ditë përfundon mandatin e tij dhe largohet nga vendi ynë.
Në ceremoninë e organizuar për nder të kapitenit të rangut të I Hilton, ministri i Mbrojtjes Peleshi i dorëzoi ushtarakut të lartë amerikan “Medaljen e Mirënjohjes” me motivacionin: “Për kontributin e veçantë të dhënë nëpërmjet punës së tij si atashe ushtarak i Shteteve të Bashkuara të Amerikës, në mbështetjen dhe zhvillimin e Forcave të Armatosura të Republikës së Shqipërisë”.
Duke vlerësuar punën dhe kontributin e atasheut ushtarak të SHBA-së në Tiranë, ministri Peleshi u shpreh se: “Kapiten Hilton do të mbahet mend si një ushtarak i devotshëm, i cili e kreu detyrën e tij me profesionalizëm të lartë, por mbi të gjitha do të mbahet mend si një mik i vyer i Ministrisë së Mbrojtjes, Forcave të Armatosura dhe vendit tonë.”
Gjithashtu, ministri i Mbrojtjes i uroi mirëseardhjen në vendin tonë edhe kapitenit të rangut II, David Millner, i cili ka marrë detyrën e atasheut të ri ushtarak të SHBA në Shqipëri. Ministri Peleshi siguroi atasheun e ri të SHBA se bashkëpunimi në fushën e Sigurisë dhe Mbrojtjes, me të dhe vendin të cilin ai përfaqëson, është një nga prioritetet kryesore të Ministrisë së Mbrojtjes.
Më pas, dy ushtarakët e lartë amerikanë u pritën edhe nga shefi i Shtabit të Përgjithshëm të FA, gjeneralmajor prof. asoc. Bajram Begaj, i cili falënderoi kapitenin e rangut të I Hilton, të cilit i dorëzoi certifikatën e mirënjohjes për kontributin e tij në forcimin e bashkëpunimit mes FA shqiptare dhe atyre amerikane.
