Kontributi i kryetarit të Komitetit Ushtarak të NATO, Air Chief Marshal Sir Stuart Peach për forcimin e marrëdhënieve të FA shqiptare me ushtritë e tjera aleate, bëri që ministri i Mbrojtjes Niko Peleshi t'i akordonte atij "Medaljen e Mirënjohjes".
Gjatë vizitës së tij në vendin tonë, që përkon edhe me përfundimin e mandatit të tij në krye të Komitetit Ushtarak të NATO-s, Air Chief Marshal Sir Stuart Peach u prit nga ministri i Mbrojtjes Niko Peleshi dhe shefi i Shtabit të Përgjithshëm të FA, gjeneralmajor Bajram Begaj.
Ministri Peleshi e cilësoi si shumë të veçantë vizitën e gjeneralit britanik, i cili mori besimin për të kryesuar Komitetin Ushtarak të NATO pikërisht në Tiranë, në shtator të vitit 2017.
Zoti Peleshi e përgëzoi Air Chief Marshal Sir Stuart Peach për lidershipin dhe profesionalizmin me të cilin ai drejtoi për gati katër vite këtë forum të rëndësishëm të Aleancës dhe për objektivat e arritura.
Air Chief Marshal Sir Stuart Peach do t'i dorëzojë detyrën e kryetarit të Komitetit Ushtarak të NATO-s, admiralit Rob Bauer, deri tani shef i Shtabit të Përgjithshëm të Forcave të Armatosura të Mbretërisë së Holandës.
© Ministria e Mbrojtjes 2024 - Të gjitha të drejtat e rezervuara.