Ministri i Mbrojtjes Niko Peleshi inspekton përfundimin e ndërtimit të urës bailey në fshatin Zall Torë në Pogradec

e diel, 22 Maj 2022 10:07

Fotogaleria

Përfundon ndërtimi i urës bailey në fshatin Zall Torë, në bashkinë e Pogradecit. Ministri i Mbrojtjes Niko Peleshi, shoqëruar edhe nga kryetari i Bashkisë Ilir Xhakolli inspektuan investimin e kryer, falë bashkëpunimit mes forcave xheniere të Forcave të Armatosura dhe pushtetit vendor. Ministri Peleshi tha se kjo urë veç banorëve të fshatit Zall Torë do t’i shërbejë edhe banorëve të 5 fshatrave në njësinë administrative Proptisht.

“Kemi ndërtuar një model pune bashkëpunimi me bashkitë, sipas të cilit një pjesë të investimit e bën bashkia, atë që ne e quajmë këmbët e urës, ndërsa pjesën tjetër të urave bailey e bëjnë forcat tona xheniere, pra e mundëson FA. Nuk është ura e parë, as e fundit që kemi ndërtuar nga veriu në jug. Pothuajse në çdo bashki kemi dorën tonë, për momentin jemi duke punuar në Pukë, Fushë - Arrëz, Selenicë të Vlorës dhe sot po inagurojmë këtë urë. Jam i kënaqur që pothuajse 4 mijë banorëve të kësaj njësie do t’u shkurtohet rruga për në shërbimet e tyre apo rrugën nacionale deri në 25 kilometra. Takova fëmijë e të rinj, të cilët frekuentojnë 4 shkolla 9-vjeçare dhe 2 shkolla të mesme, por janë edhe 8 qendra shëndetësore, të cilat me këtë rrugë afrohen shumë.”, - u shpreh ministri Peleshi.

Ministri vuri në dukje faktin se komunikimi me rrugën nacionale do të mund të zhvillojë edhe turizmin, pasi kjo zonë ka potenciale të fshehura siç janë ura e Golikut, apo monumentet historike,t ë cilat mund të tërheqin vizitorët vendas e të huaj. Në dy vite janë ndërtuar rreth 25 ura “bailey” në të gjithë vendin, të cilat u shërbejnë rreth 20 mijë banorëve.

Nga fshati Zall Torë, ministri njoftoi se të hënën Forcat e Armatosura të Shqipërisë do të përfshihen në aksionin e madh kombëtar për pastrimin e bregdetit nga veriu në jug të vendit, për të mbështetur ministrinë e Mjedisit dhe Turizmit. “Ne jemi një komponent shumë i rëndësishëm i këtij aksioni, sepse marim pjesë edhe me forcat tona edhe me mjete. E kemi bërë dhe herë tjetër, por këtë radhë është e një shkalle më të gjerë.”, - u shpreh ministri. Po ashtu Peleshi bëri të ditur se ka nisur përgatitja për emergjencat e verës. Duke kujtuar situatën e krijuar verën e kaluar nga zjarret ai kërkoi bashkëpunimin e banorëve për të informuar në kohë për çdo emergjencë, në mënyrë që të mos përsëriten raste si ai i një viti më parë.