Ministri i Mbrojtjes Niko Peleshi nderoi me Medaljen e Mirënjohjes nënkolonel Erol Munir, në një ceremoni të veçantë, në përfundim të mandatit të tij.
Nënkolonel Munir shërbeu në Tiranë si shef i Zyrës së Bashkëpunimit Ushtarak (ODC-Office of Defense Cooperation).
Në fjalën e rastit, ministri Peleshi vlerësoi punën e bërë nga nënkolonel Munir gjatë ushtrimit të detyrës në vendin tonë dhe kontributin e tij në modernizimin dhe rritjen e kapaciteteve të Forcave të Armatosura të Shqipërisë. Një kontribut të veçantë nënkolonel Munir dha edhe gjatë stërvitjes “Defender ‘21” si edhe në situata të vështira si ajo e Tërmetit të 26 nëntorit 2019 dhe pandemisë, që, sipas ministrit Peleshi tregojnë gjithashtu dhe nivelin më të lartë të bashkëpunimit strategjik me SHBA.
“Ne pamë mijëra trupa amerikane, miq që punonin së bashku përkrah Forcave të Armatosura shqiptare, duke dhënë sinjale paqeje, sigurie dhe stabiliteti për popullin tonë.
Një përpjekje e jashtëzakonshme është bërë nga nënkoloneli Erol Munir, në koordinimin e një numri të madh projektesh. Përmend këtu bashkëpunimin për strehimin e refugjatëve afganë në vendin tonë, aktivizimin e Shtabit të Avancuar të Komandës së Forcave Speciale të SHBA në Shqipëri. Vendosja e këtyre shtabeve në vendin tonë tregoi një provë të fortë të përpjekjes së pakufizuar nga ne për të rritur kapacitetet ushtarake të vendeve të rajonit tonë dhe për t'i dhënë ndihmë të vazhdueshme Forcave tona të Armatosura”, - u shpreh ministri Peleshi, duke theksuar mirënjohjen dhe vlerësimin për aleatin dhe partnerin strategjik, Shtetet e Bashkuara të Amerikës për mbështetjen e pakursyer në gjithë këto vite.
Nga ana e tij, nënkolonel Munir falënderoi ministrin për vlerësimin dhe Forcat e Armatosura për bashkëpunimin e shkëlqyer ndër keto vite, duke shtuar se ikën nga Shqipëria me përshtypjet dhe konsideratat më të larta.
© Ministria e Mbrojtjes 2024 - Të gjitha të drejtat e rezervuara.