Agjencia Kombëtare e Mbrojtjes Civile (AKMC) certifikoi sot Skuadrën e Vullnetarëve të Reagimit të Shpejtë, të cilët u trajnuan në teori dhe praktikë për disa muaj me radhë, përmes një donacioni të LëvizAlbania. Të rinjtë e kësaj skuadre u pajisën me certifikatat përkatëse nga AKMC dhe konsiderohen pjesë e rrjetit të vullnetarëve në rastet e fatkeqësive natyrore.
Në ceremoninë e zhvilluar me rastin e certifikimit të tyre, drejtori i Përgjithshëm i Agjencisë Kombëtare të Mbrojtjes Civile z. Haki Çako, e vuri theksin tek kjo iniciativë, duke e cilësuar atë, si një vizion dhe vullnet, që i shërben Mbrojtjes Civile, por edhe krijimit të një kulture të përhershme për krijimin, trajnimin dhe ngritjen e rrjeteve të vullnetarëve në Shqipëri. Zoti Çako tha se në principet e Agjencisë Kombëtare të Mbrojtjes Civile, por edhe një reforme të jashtëzakonshme, që është ndërmarrë deri tani, por edhe më shumë në të ardhmen, vullnetarizmi është një pjesë e rëndësishme, ndërsa i cilësoi të rinjtë e Skuadrës së Reagimit të Shpejtë, si partnerë: “Besoj në misionin, besimin dhe përgjegjësitë tuaja. Ju do të jeni promotorë për të ndryshuar situatat. Keni një mision të rëndësishëm dhe në trajnimin disamujor me ekspertët e Agjencisë Kombëtare të Mbrojtjes Civile keni marrë bazat, sepse, për ne fokusi është Mbrojtja Civile” - tha Çako, ndërsa u bëri të ditur të rinjve të këtij rrjeti vullnetarësh, se për herë të parë u miratua nga qeveria shqiptare, Strategjia e Riskut nga Fatkeqësitë Natyrore, një dokument që ka munguar deri më tani.
Duke folur për vullnetarizmin, zoti Çako u ndaj tek ky proces, të cilin e quajti një investim të së ardhmes dhe vlerë të shtuar për Mbrojtjen Civile, referuar praktikave më të mira evropiane.
Shqipëria është anëtarësuar tashmë në Mekanizmin e Mbrojtjes Civile Evropiane dhe po punohet me të gjithë kuadrin ligjor për të qenë dhe vepruar njësoj si agjencitë e tjera të Mbrojtjes Civile, ku një element mjaft i rëndësishëm është vullnetarizmi. Zoti Çako foli edhe për aspektin ligjor, një nga sfidat e tjera që ka shërbimi vullnetar dhe për të cilin grupe pune janë duke punuar, për të finalizuar deri në detaje këtë strukturë.
