Newsroom Ekspertët kibernetikë të Institutit për Siguri në Qeverisje bashkëpunim me Ministrinë e Mbrojtjes dhe Agjencitë Shqiptare për Sigurinë Kibernetike
Mes sfidave të sotme në rritje të sigurisë kibernetike, Ministria e Mbrojtjes së Shqipërisë ndërmori një hap të rëndësishëm drejt forcimit të mbrojtjes kibernetike, duke bashkëpunuar me Institutin për Siguri në Qeverisje në SHBA. Përgjatë një jave, ekspertë të sigurisë së Ministrisë së Mbrojtjes dhe organizata të tjera qeveritare të rëndësishme, përgjegjëse për sigurimin e qëndrueshmërisë kibernetike të rrjeteve dhe të dhënave të vendit, u bënë pjesë e aktivitetit të ekspertëve kibernetikë nga “Defense Security Cooperation University”. Ky angazhim është i dyti në një seri dyvjeçare të misioneve këshilluese jorezidente për ndërtimin e kapaciteteve kibernetike me Ministrinë e Mbrojtjes së Shqipërisë.
Ky seminar me fokus në zhvillimin e strategjisë kibernetike, i mundësoi Ministrisë së Mbrojtjes dhe zyrtarëve të tjerë kryesorë të qeverisë që të qartësojnë kuptimin e tyre të ndërsjellë të strategjive kibernetike kombëtare dhe të mbrojtjes si dhe të planifikojnë zbatimin e strategjisë dhe burimet që kanë. Seminari çoi në një mirëkuptim më të gjerë se si ministritë e tjera dhe organizatat kibernetike të Ministrisë së Mbrojtjes mund të komunikojnë dhe bashkëpunojnë më mire në mbrojtjen e strukturës kibernetike të Shqipërisë.
Ministria e Mbrojtjes, Drejtoria e Planifikimit dhe Monitorimit të Mbrojtjes J-5/8, Shtabit të Përgjithshëm, Njësia Kibernetike Ushtarake (NJKU), Autoriteti Kombëtar për Certifikimin Elektronik dhe Sigurinë Kibernetike (AKCESK) dhe Agjencia Kombëtare për Shoqërinë e Informacionit (AKSHI) morën pjesë në këtë seminar njëjavor të zhvillimit të strategjisë kibernetike. Ekspertët e Institutit për Siguri në Qeverisje zhvilluan ushtrime dhe diskutime që i çuan pjesëmarrësit të zhvillonin njohuri të reja dhe identifikuan hapa konkretë që mund të ndërmerren për të përmirësuar pozicionin e sigurisë kibernetike të Shqipërisë. Ekspertët tanë morën praktikat dhe parimet më të mira të operacioneve kibernetike dhe i zbatuan ato në strategjitë, prioritetet e sigurisë dhe kontekstin e Shqipërisë. Seminari theksoi zhvillimin e planeve të veprimit për linjat prioritare të përpjekjeve që identifikojnë qëllimet dhe objektivat, si dhe detyrat specifike për të udhëhequr veprimet aktuale dhe të ardhshme dhe vendimmarrjen në nivel ministror. Këto linja përpjekjesh do të formojnë dhe informojnë vendimet në lidhje me buxhetimin kibernetik, blerjen, fuqinë punëtore dhe operacionet.
Ministria e Mbrojtjes do të mirëpresë një këshilltar nga ky institut, i cili do të mbështesë drejtpërdrejtë Njësinë tonë Kibernetike Ushtarake me këshilla dhe asistencë ndërsa ajo rritet dhe zhvillon aftësitë e saja kibernetike. Këshilltari do të qëndrojë në Shqipëri për dy vjet dhe do të kontribuojë për këshillimin dhe edukimin jorezident. Shqipëria po demonstron një angazhim të fortë për të zhvilluar aftësitë e saja të sigurisë kibernetike dhe duke kontribuar në përpjekjet e NATO-s, Bashkimit Evropian dhe Shteteve të Bashkuara për të përforcuar normat e sjelljes së përgjegjshme të shtetit në hapësirën kibernetike.
Drejtuesi i Institutit për Siguri në Qeverisje, z. David Radcliffe, pohoi se “Shqipëria është një partner i rëndësishëm i Shteteve të Bashkuara dhe ne vazhdojmë të jemi të befasuar me energjinë dhe entuziazmin që kolegët tanë në Shqipëri po i përkushtohen përmirësimit të aftësive të tyre në hapësirën kibernetike. Mezi presim të vazhdojmë të punojmë krah për krah me miqtë tanë shqiptarë për ndërtimin e kapaciteteve institucionale kibernetike.”
Instituti do të vazhdojë të zhvillojë aktivitete me Ministrinë e Mbrojtjes së Shqipërisë gjatë viteve të ardhshme mbi strategjinë dhe politikën kibernetike dhe të ndihmojë në zhvillimin e fuqisë punëtore kibernetike.
