Konferenca “BalkanSecure”, zëvendësministri Tola: Forcojmë bashkëpunimin ndaj sulmeve kibernetike

e premte, 18 tetor 2024 09:50

Fotogaleria

Përmirësimi i Kapaciteteve të Reagimit ndaj Incidenteve Kibernetike në Ballkanin Perëndimor - është tema e Konferencës dyditore “BalkanSecure 2.0”, e organizuar këtë vit në Shqipëri, në mjediset e Qendrës së Inovacionit, Sigurisë dhe Mbrojtjes.

Nisma zhvillohet në bashkëpunim me Sense Cyber Research Center, Chevening Alumni Kosovo si edhe me Qendrën e Inovacionit të Sigurisë dhe Mbrojtjes, mbështetur nga Chevening Alumni Programme dhe Foreign Commonwealth and Development Office (FCDO) të Mbretërisë së Bashkuar.

Zëvendësministri i Mbrojtjes z. Dorian Tola, i pranishëm në këtë aktivitet, tha se gjatë viteve të fundit, janë parë ndryshime të mëdha gjeopolitike në mjedisin e dyfishtë të sigurisë: “Kanë hyrë kërcënime të reja, të sofistikuara, që synojnë veçanërisht infrastrukturën digjitale. Lufta hibride, e cila kombinon sulmet kibernetike, fushatat dizinformuese, presionin ekonomik, si dhe intimidimin ushtarak, është shndërruar në një instrument të zakonshëm për destabilizim. Për Shqipërinë dhe Ballkanin Perëndimor, këto kërcënime nuk janë vetëm teorike, ato janë reale dhe të afërta. Ne kemi përjetuar sulme kibernetike, që kanë pasur si objektiv infrastrukturën kritike. Kjo thekson nevojën urgjente që ne të forcojmë mbrojtjen tonë kibernetike.”- theksoi zëvendësministri Tola.

Gjatë dy ditëve, do të angazhohen përfaqësues nga Computer Emergency Response (or readiness) Team (CERT) dhe Computer Security Incident Response Team  (CSIRT) në të gjithë rajonin si edhe Chevening Western Balkans Cyber Security Fellows, që do të marrin pjesë në diskutime paneli, punëtori teknike dhe simulime të krizave reale.

Sipas zëvendësministrit Tola, në nivel kombëtar, siguria kibernetike është shndërruar në gur themeli të strategjisë së mbrojtjes të Shqipërisë: “Strategjia jonë e Mbrojtjes fokusohet në krijimin e një kuadri të qëndrueshëm për adresimin e kërcënimeve të reja. Shqipëria është e angazhuar të forcojë kapacitetet e mbrojtjes duke zhvilluar infrastrukturën e duhur, duke përmirësuar koordinimin ndërmjet agjencive, si dhe duke adoptuar praktikat më të mira ndërkombëtare”, - shtoi zëvendësministri Tola.

BalkanSecure 2.0 është ngritur mbi suksesin e edicionit të parë të vitit të kaluar.