Parlamenti ratifikon marrëveshjen me Slloveninë për emergjencat, Ministri Vengu: Hap i rëndësishëm në forcimin e kapaciteteve në përballimin e sfidave globale

e premte, 13 dhjetor 2024 18:25

Parlamenti ratifikoi me shumicë votash Marrëveshjen ndërmjet Qeverisë së Republikës së Sllovenisë dhe Këshillit të Ministrave të Republikës së Shqipërisë mbi Bashkëpunimin në Mbrojtje ndaj katastrofave natyrore dhe të tjera.

Gjatë seancës së zhvilluar në Parlament, ministri i Mbrojtjes z. Pirro Vengu e cilësoi një hap shumë të rëndësishëm për forcimin e kapaciteteve tona kombëtare dhe përmirësimin e bashkëpunimit ndërkombëtar në përballimin e sfidave globale. Ky bashkëpunim i ndërsjellë mes dy vendeve, sipas ministrit Vengu, përfshin kryesisht fusha si: shkëmbimi i njohurive shkencore dhe teknike si dhe transferimin e ekspertizës dhe përvojës në mbrojtje nga fatkeqësitë natyrore dhe fatkeqësitë e tjera; edukimin dhe aftësimin e personelit që merr pjesë në aktivitetet e mbrojtjes dhe shpëtimit; zhvillimin dhe prodhimin e pajisjeve të mbrojtjes dhe shpëtimit; njoftimin e ndërsjellë të rreziqeve nga katastrofa dhe pasojat e tyre, ndihmën në rast të fatkeqësive natyrore dhe fatkeqësive të tjera në mbrojtje dhe shpëtim, si dhe zbutjen dhe eliminimin e pasojave të tyre.

Sipas marrëveshjes, kjo ndihmë e ndërsjellë mund të përfshijë ekipe shpëtimi dhe ekspertë individualë, pajisje mbrojtëse dhe shpëtimi dhe ndihmë humanitare.

Po ashtu në marrëveshje përcaktohet se avionët dhe anijet mund të përdoren për transport emergjent të ekipeve të shpëtimit ose ekspertëve individualë që ofrojnë pajisje ndihme, mbrojtjeje, shpëtimi dhe të tjera dhe lloje të tjera të ndihmës në përputhje me këtë marrëveshje. Ndërsa përdorimi i avionëve ushtarakë dhe anijeve ushtarake për qëllimet e kësaj marrëveshjeje lejohet vetëm në marrëveshje me shtetin pritës.