Nënshkruhet në Bruksel Marrëveshja e Partneritetit të Sigurisë dhe Mbrojtjes me BE, ministri Vengu: Fuqizon FA dhe rrit angazhimet tona në rrugën e integrimit

e mërkurë, 18 dhjetor 2024 13:02

Fotogaleria

Ministri i Mbrojtjes z. Pirro Vengu së bashku me ministrin për Evropën dhe Punët e Jashtme, z. Igli Hasani nënshkruan sot në Bruksel, me përfaqësuesen e Lartë të Bashkimit Evropian znj. Kaja Kallas Marrëveshjen e Partneritetit të Sigurisë dhe Mbrojtjes mes Shqipërisë dhe Bashkimit Evropian.

Firmosja e kësaj marrëveshjeje zyrtarizon bashkëpunimin e zgjeruar në fusha të ndryshme të Sigurisë dhe Mbrojtjes.

Ministri Vengu e cilësoi marrëveshjen impuls cilësor të ndërveprimit në fushën e Sigurisë dhe Mbrojtjes, në kuadër të rrugëtimit të pakthyeshëm të integrimit në BE.

“Tashmë do të kemi më shumë mundësi dhe instrumente evropiane për fuqizimin e Forcave të Armatosura të Shqipërisë, ndërkohë që jam i bindur se do të japim më të mirën dhe do të shtojmë vlerë në angazhimet operacionale të Bashkimit Evropian”, - u shpreh Vengu pas nënshkrimit të marrëveshjes.

Firmosja e këtij dokumenti të rëndësishëm vjen në kuadër të Samitit BE - Ballkani Perëndimor, që po zhvillohet në Bruksel.