Kuvendi miraton ligjin për rezervistët, Vengu: Do të përdoren për stërvitje, misione ushtarake, humanitare, apo civile

e enjte, 19 dhjetor 2024 23:39

Kuvendi i Shqipërisë miratoi me 74 vota pro ligjin “Për Organizimin dhe Funksionimin e Forcës Rezerviste në Republikën e Shqipërisë”.

Ligji parashikon rikthimin në Forcat e Armatosura të komponentit rezervist, i cili do të arrijë deri në 20% të forcës aktive ose rreth 2100 vetë në 5 deri 6 vitet që vijnë.

Në fjalën e tij në Kuvend përpara votimit, ministri i Mbrojtjes Pirro Vengu shpalosi para deputetëve të pranishëm risitë që pritet të sjellë ky ligj në organizimin e FA. “Shërbimi rezervist është një shërbim vullnetar dhe do të jetë një komponent i mirëintegruar me forcën aktive, në funksion të rritjes së gatishmërisë dhe efikasitetit të mobilizimit të Forcave të Armatosura, në misione ushtarake, humanitare, apo civile, si brenda ashtu edhe jashtë vendit. Ky shërbim do të ofrojë një fleksibilitet operacional duke mundësuar mobilizim të shpejtë gjatë krizave ose emergjencave.“ - theksoi ministri.

Më tej, ministri i Mbrojtjes hyri në detaje për shtetasit që mund t’i bashkohen këtij shërbimi, kohëzgjatjen, por edhe trajtimin financiar të tyre për periudhën që do jenë të thirrur nën armë: “Kanë të drejtë t’i bashkohen forcës rezerviste shtetasit shqiptarë, që nuk janë të dënuar me burgim me vendim të formës së prerë për kryerjen e një krimi. Mosha maksimale për t’u bërë pjesë e forcës rezerviste është 50 vjeç për ushtarët/detarët, 55 vjeç për nënoficerët dhe 60 vjeç për oficerët. Kohëzgjatja e shërbimit si rezervist është nga 14 ditë deri në 45 ditë në vit, por edhe më gjatë në rast se kërkohen stërvitje më specifike, pjesëmarrje në operacione apo misione ndërkombëtare të drejtuara nga OKB/NATO/BE, në operacione apo misione humanitare apo në operacione në mbështetje të Mbrojtjes Civile. Shpenzimet financiare ndaj rezervistëve reflektojnë trajtimin më dinjitoz që kemi ndaj të gjithë komponentit ushtarak në detyrë, pasi paga mesatare për 11 kategori është 97.300 lekë dhe paga ditore e pjesëtuar me 22 ditë është afërsisht 4.600 leke/ditë për ushtarak.” - tha ndër të tjera ministri Vengu.

Rikthimi i shërbimit rezervist në Forcat e Armatosura do të nisë më krijimin e një kompanie në vitin 2025, për t’u rritur gradualisht vit pas viti, për të arritur deri në 4 kompani në vitin 2030.