Reshje intensive dhe borë në disa qarqe të vendit

e diel, 22 dhjetor 2024 13:42

Sipas raportimeve nga IGJEO dhe Shërbimi Meteorologjik Ushtarak (SHMU), sot pasdite priten reshje të dobëta në të gjitha qarqet e vendit.

Ndërkohë, nesër, më 23 dhjetor, reshje intensive deri shumë intensive do të përfshijnë qarqet Vlorë, Gjirokastër, Shkodër, Kukës dhe Dibër, ndërsa në zonat e tjera reshjet do të jenë mesatare deri intensive, të shoqëruara me shtrëngata. Në zonat malore mbi 400 metra në Veri, Lindje dhe Juglindje, reshjet do të jenë në formë dëbore, duke shkaktuar ngrica dhe vështirësi në transport.

Ministria e Mbrojtjes, nëpërmjet Agjencisë Kombëtare të Mbrojtjes Civile, u bën thirrje strukturave vendore dhe qendrore të marrin masa parandaluese për shmangien e përmbytjeve dhe të jenë në gatishmëri për reagim të menjëhershëm ndaj çdo situate emergjente.

Bashkëpunimi dhe veprimi i shpejtë janë thelbësore për të minimizuar pasojat dhe për të garantuar sigurinë e qytetarëve.