Ndërrohen trupat shqiptarë në misionet jashtë vendit, Vengu: Ditë krenarie, Shqipëria dinjitoze në arenën ndërkombëtare

e enjte, 26 dhjetor 2024 13:50

Një togë nga Regjimenti i Këmbësorisë së Jugut, mes të cilëve 2 vajza u nisën për në grup-batalionin e NATO-s në Bullgari, ndërkohë që u kthye nga misioni i KFOR në Kosovë, kontingjenti i radhës i përbërë nga Regjimenti i Operacioneve Speciale.

Në ceremoninë e pritjes dhe përcjelljes së dy kontingjenteve në Zall Herr, morën pjesë edhe ministri i Mbrojtjes Pirro Vengu, i shoqëruar nga shefi i Shtabit të Përgjithshëm të FA gjenerallejtënant Arben Kingji dhe komandanti i Forcës Tokësore, gjeneralmajor Ilir Xhebexhia.

Në fjalën e tij, ministri Vengu përgëzoi për përkushtimin trupat që nisen në mision në këtë periudhë festash, pa harruar të vlerësojë edhe sakrificën e familjeve të tyre.

Ministri i Mbrojtjes foli për rëndësinë që ka kontributi i Forcave të Armatosura shqiptare në misionet e NATO-s, jo vetëm për sigurinë, por edhe për rolin dhe prestigjin e vendit tonë në arenën ndërkombëtare. "Prania juaj në dy misione të ndyshme në rajon për të ofruar siguri, flet shumë dhe sot është një ditë krenarie dhe reflektimi për të gjithë ne. Misioni juaj, pavarësisht vendndodhjes apo rrethanave, përfaqëson më shumë se detyrë, ai përfaqëson përkushtimin, guximin dhe dinjitetin e Shqipërisë dhe përmbushja e tij me sukses e di shumë mirë që kërkon sakrifica. Në Bullgari, ju do të kontribuoni në përforcimin e krahut lindor të NATO-s, duke ndihmuar në ruajtjen e paqes dhe stabilitetit në një kohë sfidash të shumta për sigurinë globale ne kemi treguar se sa besnikë e të përkushtuar jemi për të plotësuar detyrimet tona ndaj Aleancës, pikërisht falë kontributit që keni dhënë dhe do të jepni në të ardhmen. Njëkohësisht, ata që kthehen nga misioni i KFOR-it na sjellin një shembull të shkëlqyer të profesionalizmit dhe përkushtimit, ndërsa keni dhënë kontributin tuaj në një tokë shumë të dashur për ne të gjithë, Kosovën që aq shumë ka nevojë për kontributin e të gjithëve ne si pjesë e Aleancës së madhe. Ju keni treguar se Shqipëria është një partner i besueshëm dhe i përkushtuar ndaj vlerave të përbashkëta."- iu drejtua zoti Vengu trupave të rreshtuar, të cilëve iu solli në vëmendje edhe atë çfarë ata përfaqësojnë veçanërisht gjatë shërbimit në misionet jashtë vendit. "Ju nuk përfaqësoni vetëm uniformën që mbani; ju përfaqësoni fuqinë dhe dinjitetin e Shqipërisë në një skenë ndërkombëtare. Në çdo hap të rrugës, ju jeni ambasadorë të vlerave tona kombëtare dhe të qëndrueshmërisë sonë si pjesë e NATO-s."- e mbylli ministri fjalën e tij.

Kontingjenti i nisur për në misionin e NATO-s në Bullgari përbëhet nga Regjimenti i Këmbësorisë së Jugut dhe do të shërbejë për një periudhë 6-mujore i dislokuar në rajonin stërvitor të Novo Selos.