Kursi i 60-të Bazë i Nënoficerit përfundon me sukses stërvitjen komplekse 24-orëshe "Feniks 2025"

Kursi i 60-të Bazë i Nënoficerit ka përmbyllur me sukses stërvitjen komplekse 24-orëshe, të titulluar "Feniks 2025".

Pas një trajnimi intensiv dymujor në lëndët e përgatitjes fizike, zjarrit, taktikës dhe lidershipit, kursantët kanë demonstruar aftësitë e tyre si komandantë skuadrash.

Stërvitja, e cila kishte për qëllim të vlerësonte përgatitjen dhe kapacitetet e pjesëmarrësve u ndoq nga komandanti i Qendrës së Arsimimit Profesional të Nënoficerëve, kolonel Besim Bala, së bashku me stafin e instruktorëve. Ata theksuan profesionalizmin dhe përkushtimin e kursantëve, të cilët kanë dhënë një shembull të shkëlqyer të angazhimit në zhvillimin e aftësive dhe dijenive të nevojshme për rolin e nënoficerit.

Kursi i 60-të është një hap i rëndësishëm në zhvillimin e mëtejshëm të karrierës ushtarake të efektivëve të rinj, të cilët janë tashmë të gatshëm të përballen me sfidat e ardhshme.