Ministri i Mbrojtjes z. Pirro Vengu, takim me atashetë dhe përfaqësuesit ushtarakë

e premte, 24 janar 2025 19:00

Ministri i Mbrojtjes z.Pirro Vnegu priti në një takim pune atashetë ushtarakë të Republikës së Shqipërisë, të akredituar në vendet aleate dhe partnere si edhe përfaqësuesit e lartë të Republikës së Shqipërisë në strukturat kryesore të NATO-s.

Në qendër të diskutimeve ishte situata e sigurisë dhe mbrojtjes në Evropë si dhe sfidat e pritshme të vitit 2025. Ministri i Mbrojtjes, z. Pirro Vengu, theksoi rëndësinë e përfaqësimit dinjitoz të atasheve dhe përfaqësuesve ushtarakë në vendet dhe strukturat e NATO-s, ku ata shërbejnë, ndërsa kërkoi edhe një lobim më intensiv për projektet tona ambicioze në kuadër të Aleancës.

Fokus të veçantë gjatë diskutimeve në këtë aspect, iu dha projekteve madhore të infrastrukturës sonë “Host Nation” si: Baza Detare e Porto Romanos, Baza Ajrore e Kuçovës dhe mobiliteti përgjatë Korridorit VIII.

Ministri i Mbrojtjes kërkoi angazhim për rritjen e bashkëpunimit me vendet aleate dhe partnere në fushën e Industrisë së Mbrojtjes, e cila mbetet një prioritet i padiskutueshëm tashmë që edhe baza ligjore u kompletua me krijimin e Agjencisë së Industrisë së Mbrojtjes dhe kompanisë KAYO.

Atashetë dhe përfaqësuesit ushtarakë u njohën me objektivat kryesore për vitin 2025 bazuar edhe në dokumentet strategjike të hartuara dhe miratuara rishtaz si dhe ndanë me ministrin e Mbrojtjes dhe stafin e tij ide për përmirësimin e komunikimit dhe të bashkërendimit të veprimeve mes tyre.

Atashetë dhe përfaqësuesit ushtarakë zhvilluan takime edhe me strukturat respektive në Ministrinë për Evropën dhe Punët e Jashtme, shefin e Shtabit të Përgjithshëm të FA, Agjencinë e Industrisë së Mbrojtjes si dhe Qendrën e Inovacionit të Mbrojtjes dhe Sigurisë, në interes të promovimit të Forcave të Armatosura në vendet ku shërbejnë.