Situata nga reshjet në qarkun e Durrësit, ministri Vengu ndjek punën në Shkozet dhe zonën e ish-Kënetës: Vëmendje maksimale

e enjte, 30 janar 2025 17:15

Ministri i Mbrojtjes, z. Pirro Vengu ishte në Durrës, ku ndoqi nga afër punën e forcave të angazhuara për riparimin e dëmeve të shkaktuara nga reshjet intensive të shiut, një ditë më parë. I shoqëruar edhe nga kryetarja e Bashkisë së Durrësit, znj.Emiriana Sako dhe prefekti i qarkut të Durrësit, z.Emiljan Jani, ministri Vengu inspektoi ndërhyrjet në Shkozet dhe në zonën e ish-Kënetës, në Durrësin e ri.

“Pas një situate reshjesh shumë të dendura për më shumë se 12 orë rresht, Durrësi ka njohur një situatë komplekse për sa i përket përmbytjeve." - u shpreh ministri. Bashkia, shtoi ai, do të vijojë punën sa i përket evidentimit të dëmeve.

Sipas ministrit të Mbrojtjes, hidrovori ka funksionuar në kapacitet të plotë dhe vijon edhe tashmë të funksionojë në kapacitet të plotë, ndërsa po vijon pastrimi i disa zonave, ku prurjet e ujërave kanë shkaktuar probleme.
Ministri Vengu kërkoi vëmendje maksimale, ndërsa deklaroi se Forcat e Armatosura do të jenë në gatishmëri, në ndihmë të strukturave vendore deri në normalizimin e plotë të situatës.

Ndërsa kryetarja e Bashkisë së Durrësit Emiriana Sako sqaroi se, situata në qendër të qytetit dhe kryqëzimet kryesore paraqitet e qetë. Sipas saj, problematikat më të shumta janë në zonat e ish-Kënetës, Shkozetit apo zonën e plazhit, ku ekipet e emergjencave vijojnë të jenë në terren gjatë gjithë kohës, ndërsa grupet për vlerësimin e dëmeve kanë nisur punën për të patur një bilanc dhe më pas pritet vendimi për të dëmshpërblyer banorët e prekur.