Industria e Mbrojtjes, ministri Vengu takim me zyrtarin e lartë të Ministrisë së Mbrojtjes së Francës

e hënë, 03 shkurt 2025 11:35

Ministri i Mbrojtjes z. Pirro Vengu dhe delegacioni që e shoqëronte zhvilluan një takim me drejtorin e DGA për Evropën Qendrore, Lindore dhe Amerikën Latine, gjeneral brigade Emeric Wininger në Ministrinë e Mbrojtjes së Francës. Në fokus të këtij takimi ishte bashkëpunimi i mundshëm në Industrinë e Mbrojtjes. Dy delegacionet diskutuan rreth mundësive për të ofruar ekspertizë dhe praktikat më të mira mbi proceset e zhvillimit te kapaciteteve.

Ministri i Mbrojtjes z. Vengu shprehu interesin e palës shqiptare në lidhje me bashkëpunimin e mundshëm dhe një partneritet afatgjatë me kompanitë franceze të Mbrojtjes, i cili do mund të kontribuojë në prodhimin e brendshëm të Industrisë së Mbrojtjes.

Gjithashtu, në këtë takim u ndanë mendime mbi prioritetet tona bazuar në Planin Afatgjatë të Zhvillimit të FA 2024-2033. Në kuadër të kësaj marrëdhënie, një ekip shqiptar pritet të udhëtojë në Francë për të zhvilluar një vizitë njohëse mbi pajisjet dhe sistemet e mbrojtjes në përdorim nga forcat franceze.