Prezantohet komandanti i ri i Policisë Ushtarake, nënkolonel Dhimitër Selmanaj. Ministri Vengu: Vijojmë modernizimin

e mërkurë, 12 shkurt 2025 13:59

Fotogaleria

U prezantua në një ceremoni të veçantë komandanti i ri i Policisë Ushtarake, nënkolonel Dhimitër Selmanaj. I pranishëm në këtë ceremoni ishte edhe ministri i Mbrojtjes z. Pirro Vengu, i shoqëruar nga shefi i SHP të FARSH gjenerallejtënant Arben Kingji si dhe oficerë, nënoficerë dhe personel civil i Policisë Ushtarake.

Në fjalën e tij, ministri Vengu vuri theksin te roli i Policisë Ushtarake, e cila, përveç detyrave të zakonshme, ka marrë përsipër misione gjithnjë e më të rëndësishme, përfshirë pjesëmarrjen në misione jashtë vendit dhe mbështetje për emergjencat civile. Ai e vlerësoi këtë angazhim dhe bashkëpunimin e Policisë Ushtarake me agjenci të tjera ligjzbatuese.

“Ky 33 vjetor na gjen me dy risi, e para tërësia e garnizonit dhe infrastrukturës vendosen në dispozicion të Policisë Ushtarake, duke mbartur gjithashtu edhe detyrën për komandantin e ri, që t’ju mbështesë sëbashku më shtabin e tij dhe sëbashku me struktura të tjera të Ministrisë së Mbrojtjes dhe të Forcave të Armatosura për një rehabilitim tërësor të infrastrukturës, ku ju operoni. Elementi i dytë është elementi padyshim i emërimit të komandantit të ri, cili rikthehet në Policinë Ushtarake, një forcë që shpeshherë është konceptuar si e dedikuar vetëm për mbarëvajtjen e proceseve ligjzbatuese brenda Forcave të Armatosura, por që shumë e më shumë vitet kanë treguar që ka marrë përsipër misione edhe më të rëndësishme, përtej përshkrimit klasik të misionit tuaj”, - theksoi ministri Vengu.

Ministri Vengu shprehu besimin se, me komandantin e ri, Policia Ushtarake do të vazhdojë të rrisë profesionalizmin dhe përgatitjen.

“Kur them misione të tjera e kam fjalën për pjesëmarrjen tuaj në misione jashtë vendit, e kam fjalën për pjesëmarrjen tuaj në misione në mbështetje të Emergjencave Civile, ku e di veçanërisht dedikimin tuaj dhe e kam vlerësuar dhe vazhdoj ta vlerësoj maksimalisht, sikundër edhe bashkëpunimin tuaj me agjenci të tjera ligjzbatuese, mision, i cili besoj unë, duhet të përbëjë një shtyllë edhe më të fortë të profesionalizmit, përgatitjes, investimeve në kapitalin njerëzor, në sisteme, mjeteve dhe pajisje”, - theksoi z. Vengu.

Ministri theksoi gjithashtu se prioritet i këtij viti është modernizimi dhe investimi i mëtejshëm në mjetet, pajisjet dhe infrastrukturën e Policisë Ushtarake. “Do të doja që këtë vit të 34-t të aktivitetit të Policisë Ushtarake t’ia dedikonim në fakt modernizimit dhe investimeve të mëtejshme, jo vetëm në komoditet në ambientet e tuaja të punës, jo vetëm në kushte më cilësore, ku operoni, por gjithashtu edhe në mjete dhe pajisje që janë, jo vetëm të dobishme, por duhet të zhdërvjelltësojnë edhe mënyrën se si operoni”.

Ministri tha se sëbashku me shefin e Shtabit dhe komandantin e ri do të bëjnë një përmirësim cilësor, të të gjithë kuadrit operator dhe ligjor, me të cilin operon Policia Ushtarake.

Për më tepër, ministri Vengu njoftoi një rritje të trajtimit financiar për të gjitha kategoritë e personelit të Policisë Ushtarake dhe theksoi se rishikimi dhe përmirësimi i vazhdueshëm i të gjitha strukturave dhe mjeteve do të mbetet një nga prioritetet e Ministrisë së Mbrojtjes. “Ju keni përfaqësuar dhe vazhdoni ta përfaqësoni me dinjitet vendin në disa misione, në Sinai, Egjipt, Kosovë dhe detin Egje dhe jeni nga ato forca që kontribuojnë në rrezatimin e Forcave të Armatosura brenda Aleancës. Përgjegjësia juaj është e madhe, por vjen gjithashtu edhe me besimin dhe angazhim tonë ndaj jush. Ky 33 - vjetor vjen gjithashtu me një rritje të trajtimit financiar për të gjitha kategoritë e personelit ë Policisë Ushtarake dhe, nga ana tjetër si e thashë, rishikimi dhe përmirësimi i vazhdueshëm i të gjithë infrastrukturës, mjeteve dhe pajisjeve do të jetë shtylla e veprimtarisë sonë në këtë vit”, - u shpreh ministri i Mbrojtjes.

Në përfundim, ministri Vengu u shpreh se ai beson që komandanti i ri, nënkolonel Dhimitër Selmanaj, do të vazhdojë të forcojë standardet profesionale dhe të mbajë në nivele të larta disiplinën dhe zbatimin e ligjit, duke dëshmuar se Policia Ushtarake është një forcë e besueshme dhe e gatshme për t'u mbështetur nga qytetarët dhe Forcat e Armatosura.