Guardia di Finanza i dhuron dy mjete lundruese Policisë Kufitare, ministri Vengu: Forcojmë luftën kundër trafiqeve

e martë, 11 shkurt 2025 14:20

Dy anije të klasit "Vedeta 2000", donacion i Guardia Di Finanza dhe misionit Interforza i shtohen shërbimeve të Kufirit Detar.

I pranishëm në ceremoninë e dhurimit, ministri i Mbrojtjes z. Pirro Vengu e cilësoi këtë një moment të rëndësishëm në forcimin e kapaciteteve të monitorimit të hapësirave detare të Shqipërisë.

Në fjalën e tij, ministri Vengu theksoi rëndësinë e bashkëpunimit të shkëlqyer dhe mbështetjes së vazhdueshme nga partnerët italianë: “Dhurimi i dy anijeve të klasit ‘Vedeta 2000’ nga Guardia di Finanza dhe Misioni Interforza është një dëshmi padyshim e bashkëpunimit të shkëlqyer dhe mbështetjes së vazhdueshme që marrim nga partnerët tanë italianë, në funksion të rritjes së kapaciteteve të forcave tonë të policisë dhe Forcave tona të Armatosura. Ç’është e vërteta, që prej korrikut të vitit të kaluar, nën drejtimin e dy kryeministrave, kryeministrit Rama dhe kryeministres Meloni, një ekip i përbashkët i përbërë nga Ministria e Infrastrukturës dhe Energjisë, Ministria e Mbrojtjes dhe Ministria e Brendshme sëbashku me partnerët tanë në bregun tjetër të Adriatikut, ministrat Salvini dhe Crosetto kemi mundësuar në fakt dakordësinë e një protokolli rritjesh kapacietesh për Policinë e Shtetit dhe Forcat e Armatosura Shqiptare”, - theksoi ministri i Mbrojtjes.

Ministri Vengu vuri në dukje rolin e rëndësishëm që këto anije do të luajnë në mbrojtjen e kufirit detar dhe sigurinë e shtetasve shqiptarë dhe italianë, si dhe të turistëve që vizitojnë bregdetin shqiptar.

“Ky akt është një vazhdimësi e angazhimit të përbashkët të dy qeverive për forcimin e sigurisë kufitare dhe luftën kundër trafiqeve, pasi këto anije do të luajnë një rol të rëndësishëm në mbrojtjen e kufirit detar dhe sigurinë e shtetasve shqiptarë dhe Italian si dhe të turistëve që vizitojnë bregdetin tonë”, - tha ministri Vengu.

Ministri Vengu falënderoi Guardia di Finanza për mbështetjen e palodhur dhe përpjekjet e vazhdueshme për të rritur sigurinë në rajon si dhe misionin Interforza për Policinë e Shtetit Shqiptar për bashkëpunimin intensiv dhe përkushtimin që ka mundësuar realizimin e këtij projekti në një kohë shumë të shpejtë.

Të pranishëm në ceremoninë e dorëzimit të mjeteve ishin edhe ambasadori i Italisë në Shqipëri Marco Alberti, komandanti i Përgjithshëm i Guardia di Finanza gjenerali Andrea De Gennaro, drejtori i Emigracionit në Policinë Kufitare prefekti Claudio Galzerano, zëvendësministri i Brendshëm Julian Hodaj dhe drejtori i Përgjithshëm të Policisë së Shtetit Ilir Proda.

Dy anijet e klasit "Vedeta 2000", janë të lehta, të shpejta dhe funksion kryesor kanë ndjekjen dhe interceptimin e mjeteve lundruese në det, duke ndihmuar kështu për një monitorim e kontroll efikas të hapësirës detare të vendit tonë për mjetet lundruese në funksion të parandalimit dhe luftës kundër trafiqeve dhe kontrabandës që mund të kryhet nëpërmjet hapësirës detare, si dhe rritjes së sigurisë së shtetasve vendas dhe turistëve të huaj që shfrytëzojnë bregdetin shqiptar për të kaluar pushimet