Dalin në lirim katër pjesëtarë të Forcës Ajrore, ministri Vengu: Të angazhuar të rrisim mbështetjen

e mërkurë, 19 shkurt 2025 11:01

Ministri i Mbrojtjes, z. Pirro Vengu mori pjesë në ceremoninë e daljes në lirim të katër ushtarakëve, pilotë dhe teknikë të Forcës Ajrore, që përmbyllën një kapitull të rëndësishëm të jetës së tyre.

Fotogaleria

Gjatë ceremonisë, ministri Vengu vlerësoi përkushtimin dhe sakrificat e nënkolonel Faslli Spahiut, nënkolonel Pajtim Golemi, major Dhori Martiri, të cilët kanë dhënë një kontribut të jashtëzakonshëm në mbrojtjen e hapësirës ajrore dhe sigurisë së Shqipërisë si dhe përkushtimin e teknikut Bardhok Marku.

Gjatë fjalës së tij, ministri Vengu u shpreh se: “secili prej tyre ka shkruar një faqe të rëndësishme në historinë e Forcës Ajrore Shqiptare. Dedikimi për atdheun, dedikimi për sigurinë kombëtare është një virtyt, i cili edhe mund të mësohet, edhe mund trashëgohet dhe kjo na jep një përgjegjësi mjaft të madhe kur vjen puna te dedikimi ndaj kapitalit njerëzor pranë FA dhe posaçërisht pranë Forcës Ajrore”, - u shpreh ministri i Mbrojtjes.

Ministri i Mbrojtjes, z. Pirro Vengu, theksoi angazhimin e qeverisë dhe Ministrisë së Mbrojtjes për përmirësimin e kushteve të punës dhe trajtimit të personelit të Forcës Ajrore: "Qeveria dhe Ministria e Mbrojtjes kanë punuar për të përmirësuar kushtet e punës dhe trajtimin e pilotëve, teknikëve dhe personelit tjetër mbështetës. Kemi ende shumë punë për të bërë. Është bërë një hap në këndvështrimin e trajtimit financiar, por kjo nuk do të ndalet me kaq. Është dedikim i kësaj qeverie që të vijojë rritjen e trajtimit financiar dhe rritjen e mbështetjes qoftë shëndetësore, por edhe sociale për Forcat e Armatosura dhe veçanërisht për Forcën Ajrore, për personelin fluturues dhe mirëmbajtës."  - u shpreh ministri Vengu.

Ministri gjithashtu theksoi prioritetet e tjera të Qeverisë për zhvillimin e forcimin e Forcës Ajrore, duke përfshirë, rritjen e kapaciteteve njerëzore operacionale dhe përmirësimin e infrastrukturës, blerjen e avionëve me përdorim të dyfishtë për mbështetje dhe për emergjenca civile, investime në sistemet e komunikimit dhe informacionit në Bazën Ajrore Taktike të NATOS në Kuçovë apo kompletimin dhe mirëmbajtjen e helikopterëve Blackhawk, në bashkëpunim me partnerët strategjikë, Shtetet e Bashkuara të Amerikës.

Pjesë e ceremonisë së daljes në lirim të 4 pilotëve e teknikëve ishin komandanti i Forcës Ajrore, gjeneralmajor Ferdinant Dimo, oficerë, nënoficerë dhe punonjës civilë të Forcës Ajrore, si dhe familjarë.