Shqipëria zgjidhet në Këshillin e Organizatës Ndërkombëtare për Ndihmat Detare në Lundrim (IALA)

e martë, 25 shkurt 2025 11:53

Nga data 18 deri më 21 shkurt 2025, u zhvillua në Singapor, Asambleja e parë e Përgjithshme e Organizatës Ndërkombëtare për Ndihmat Detare në Lundrim (International Organization for Marine Aids to Navigation - IALA), pas kalimit të saj në statusin e një organizate ndërqeveritare më 22 gusht 2024.

Ky event i rëndësishëm mblodhi rreth 400 delegatë nga 65 vende, përfshirë zyrtarë të lartë qeveritarë dhe liderë të industrisë detare, duke ofruar një platformë për shkëmbimin e ideve dhe praktikave më të mira në fushën e sigurisë lundrimore.

Shqipëria u përfaqësua nga komandanti i Forcës Detare/Rojës Bregdetare nënadmiral Adnand Agastra, i cili në fjalën e tij theksoi nevojën për një sistem të avancuar ndihmash detare që të lehtësojë transportin detar të qëndrueshëm dhe të mbrojë mjedisin detar, veçanërisht në ekosistemin e Mesdheut.

Gjatë asamblesë, Shqipëria u zgjodh në Këshillin e IALA-s, duke dëshmuar angazhimin e saj për të përmirësuar standardet ndërkombëtare të sigurisë lundrim dhe për të promovuar praktikat e qëndrueshme.

Ky aktivitet theksoi rëndësinë e bashkëpunimit ndërkombëtar në përmirësimin e sigurisë dhe efikasitetit në lundrim, duke nxitur gjithashtu ruajtjen e mjedisit detar për brezat e ardhshëm.

Shqipëria është e përkushtuar të luajë një rol aktiv në këtë proces, duke promovuar standardet më të larta në fushën e ndihmave detare dhe duke kontribuar në një të ardhme më të sigurt dhe të qëndrueshme për mjedisin detar.