Anija “Butrinti” operacion shpëtimi për 36 emigrantë në detin Egje

e hënë, 03 mars 2025 12:19

Gjatë patrullimit në Detin Egje, anija Butrinti realizoi një operacion shpëtimi (SAR), duke i ardhur në ndihmë një gomoneje me 36 emigrantë nga Lindja e Mesme, mes tyre 12 fëmijë, që ishte nisur nga Çeşme me destinacion ishullin e Chios-it.

Në përfundim të operacionit, emigrantët u morën nga Roja Bregdetare turke, e cila falënderoi palën shqiptare për ndihmën e dhënë nga anija Butrinti.

Forca Detare vijon kontributin e saj në këtë mision të rëndësishëm, pjesë e Grupit të 2-të Detar të NATO-s në operacionin Sea Guardian, duke garantuar jetën në det dhe menaxhuar emigrimin e paligjshëm në zonën e detit Egje.