Kampusi i ri i Akademisë së Forcave të Armatosura sjell në Shqipëri modelin e një prej akademive më të mira në SHBA, West Point

e enjte, 06 mars 2025 15:03

Kampusi i ri Akademisë së Forcave të Armatosura, një investim i shtrirë në një hapësirë prej 10 hektarësh, i cili po ndërtohet sipas modelit të një prej akademive më të mira në SHBA, West Point, është drejt finalizimit të fazës së parë të projektit.

Fotogaleria

I konceptuar me standardet më të larta të NATO, kampusi do të ofrojë gjithçka bashkëkohore që nga godina mësimore, konvikti, qendra shëndetësore, kinemaja, palestra, pishina e mbyllur, terrenet sportive dhe ato të stërvitjes ushtarake në natyrë, si poligonet, pista e vrapit, kulla e alpinizmit, etj

Akademia e re do të ketë si fillim 300 studentë dhe degë të reja, përfshirë dhe inteligjencën artificiale, ku do të ketë diploma të përbashkëta me Universitetin Politeknik në degë të caktuara, por dhe binjakëzime me akademitë e vendeve aleate të NATO.

Kryeministri Rama ishte sot në kantier për të ndjekur ecurinë e punimeve, së bashku me ministrin e Mbrojtjes Pirro Vengu.

“Në këtë repart të Tufinës, praktikisht jemi në një njollë prej 45 ha, 10 ha janë të dedikuara tërësisht për Akademinë e re të Forcave të Armatosura. Masterplani presupozon 3 faza, është duke u finalizuar pjesa e parë, e cila parashikon një objekt kryesor për fakultetin e Sigurisë dhe Mbrojtjes që është shtylla kryesore e akademisë në fakt ku kemi rreth 300 studentë, të cilët do të akomodohen që në sezonin e ardhshëm me përfundimin e punimeve.
Përfundimi i punimeve parashikohet nga inxhinierët praktikisht brenda korrikut. Kemi rehabilituar tërësisht një godinë të vjetër të repartit ku do jetë dhe mensa, e cila ka të gjitha kapacitetet për tërësinë e stafit dhe tërësinë e personelit dhe të studentëve që në fazë të parë dhe do vijojnë pastaj me godinën kryesore, e cila është në përfundim e sipër. Masterplani parashikon në fazë të dytë edhe të gjithë elementët mbështetës, fushat sportive, konviktin, të cilin jemi duke i dizajnuar me arkitektët ndërkombëtare në mënyrë që e gjithë akademia të ketë mundësi pastaj që të rrisë edhe numrin e studentëve.” – shpjegoi ministri i Mbrojtjes Pirro Vengu, i cili foli gjithashtu për rekrutimet e reja në akademi.

“Vitin aktual, praktikisht në shtator, patëm një sezon shumë të mirë rekrutimesh, rreth 1100 aplikantë dhe, me një përzgjedhje shumë strikte, nga 1100 aplikantë praktikisht vetëm 87 kemi marrë, që është një normë seleksionimi shumë e rreptë. Por kjo tregon që ka kërkesa të mëdha, në fakt, për t’u atashuar në programet e akademisë, programet bachelor dhe programet master. Sivjet kemi edhe programe për mbrojtjen kibernetike, me shumë interes edhe nga personel civil, personel nga të gjitha agjenci të tjera ligjzbatuese, që janë të interesuar të gjenerojnë kapacitete për mbrojtje kibernetike.
Kësaj radhe, për herë të parë, kemi dhe programin për Inteligjencën Artificiale, sepse me të gjithë programet që kanë të bëjnë me Industrinë Ushtarake, që kanë të bëjnë me sistemet e mbrojtjes, simulatorët, Shkollën e re të Aviacionit, që siç e dini, e kemi në plan të ndërtojmë, patjetër që edhe elementët e AI do të integrohen.” – u shpreh ai.

Ndërsa sa i takon harmonizimit të projektit të kampusit me mjedisin përreth, ministri Vengu tha se: “Besoj se është nga të vetmet kampuse ndoshta në Republikën e Shqipërisë që ka edhe elementin e natyrës tërësisht dominues në tërësinë e pronës dhe do të përpiqemi që gjithmonë në çdo fazë të zhvillimit, këtë kemi biseduar dhe me arkitektë ndërkombëtarë, që t’i përmbahemi elementit natyror që të mos kemi struktura që pushtojnë, por struktura që integrohen dhe janë me intensitet të ulët. Kemi dhe burime qe vijnë nga mali dhe do të përpiqemi t’i integrojmë në mënyrë sepse është uji i pastër dhe që ka kaluar për përdorime ushtarake në të kaluarën, dhe do të përpiqemi ta integrojmë në natyrë dhe në funksionalitet të të gjithë akademisë.” - detajoi ai.

Nga ana e tij, kryeministri Rama tha se, ndonëse afatet e parashikuara për përfundimin e plotë të kampusit janë të rëndësishme, kryesore mbetet cilësia: “Unë them, në të gjitha rastet, të kapim patjetër korrikun, por me cilësi. Në tetor për vitin akademik mbase bëhet gati. Nuk duhet të nxitohemi, duhet bërë çdo gjë perfekt. Është gjithë ky investim, duhet të jetë perfekt. Arkitektura është e bukur, hapësirat janë të bukura, koncepti i brendshëm është i bukur. Unë them që 6 muaj të mira i do kjo, që të jetë tamam.” – sugjeroi kryeministri.

Ndër të tjera, kryeministri tha se me përfundimin e plotë të punimeve, kampusi i ri do të jetë një pikë referimi për të gjithë Forcat e Armatosura.

“Ky kampus shpresojmë të mbarojë në dy vitet e ardhshme komplet dhe, të jetë një pikë referimi për të gjithë ushtrinë, jo vetëm për studentët, po edhe për gjithë ushtarakët, që të jetë një kampus i standardeve më të larta të kampuseve të NATO. Pastaj, mbase, edhe avancimi i projektit që kemi për atë akademinë, që duam të sjellim nga një vend aleat, do jetë super pastaj dhe do të plotësojë të gjithë. Mund pastaj, që ne të japim shërbime për të tjerë, duke sjellë të ardhura në Buxhetin e Mbrojtjes. Plus, me industrinë, jemi duke ecur mirë dhe kemi vënë disa baza të mira për të ndërtuar një industri të re ushtarake, prodhimi dhe armatimi dhe eksportesh. Komponenti i tretë: Ministra e Mbrojtjes në mbështetje të turizmit - për të vendosur një sërë asetesh në dispozicion të turizmit, me qëllim që Ministria e Mbrojtjes të mbajë një pjesë të pronësisë, duke marrë të ardhura”– u shpreh ai